शिरूर | प्रतिनिधी
शिरूर पोलीस ठाण्यात दाखल असलेल्या जीवघेण्या गोळीबार, खुनाचा प्रयत्न आणि संघटित गुन्हेगारी प्रकरणात कुख्यात गुंड योगेश केशव मचाले व त्याच्या टोळीविरुद्ध महाराष्ट्र संघटित गुन्हेगारी नियंत्रण कायदा (मोक्का) लागू करण्यात आला आहे. कोल्हापूर परिक्षेत्राचे विशेष पोलीस महानिरीक्षक यांनी या कारवाईस मंजुरी दिली असून, संघटित गुन्हेगारीविरोधातील ही महत्त्वाची कारवाई मानली जात आहे.
पोलिसांनी दिलेल्या माहितीनुसार, १९ मार्च २०२६ रोजी शिरूर तालुक्यातील मांडवगण फराटा येथील भैरवनाथ क्रिकेट मैदानावर झालेल्या वादातून फिर्यादीवर पिस्तुलातून गोळीबार करून खुनाचा प्रयत्न करण्यात आला होता. तसेच फिर्यादी व त्याच्या सहकाऱ्यांवर दगडफेक करून जीवे मारण्याच्या धमक्या देण्यात आल्या होत्या. या घटनेप्रकरणी शिरूर पोलीस ठाण्यात विविध गंभीर कलमांन्वये गुन्हा दाखल करण्यात आला होता.
तपासादरम्यान या गुन्ह्यामागे योगेश मचाले याच्या संघटित गुन्हेगारी टोळीचा सहभाग असल्याचे निष्पन्न झाले. या प्रकरणात एकूण सात आरोपींचा सहभाग समोर आला असून, त्यापैकी काही आरोपींना अटक करून न्यायालयीन कोठडीत ठेवण्यात आले आहे. दोन आरोपी जामिनावर असून टोळीचा प्रमुख योगेश मचाले अद्याप फरार असल्याचे पोलिसांनी नमूद केले आहे.
पोलिसांच्या तपासात संबंधित टोळीविरुद्ध पुणे ग्रामीण व पिंपरी-चिंचवड परिसरात खून, खुनाचा प्रयत्न, खंडणी, बेकायदेशीर शस्त्र बाळगणे, दरोडा, सरकारी कामात अडथळा अशा गंभीर स्वरूपाचे २७ गुन्हे दाखल असल्याचे आढळून आले. त्यामुळे संघटित गुन्हेगारीवर प्रभावी आळा घालण्यासाठी मोक्का कायद्यांतर्गत कारवाईचा प्रस्ताव सादर करण्यात आला होता. त्यास विशेष पोलीस महानिरीक्षकांनी मंजुरी दिल्यानंतर आरोपींवर मोक्काची कारवाई करण्यात आली.
या प्रकरणाचा पुढील तपास उपविभागीय पोलीस अधिकारी, शिरूर विभाग यांच्याकडे सोपविण्यात आला असून, पुणे ग्रामीण पोलिसांच्या मार्गदर्शनाखाली शिरूर पोलीस व स्थानिक गुन्हे शाखेच्या पथकाने ही कारवाई केली आहे.
