पुणे : गेल्यावेळी थोडक्यात महाराष्ट्र केसरी पद हुकलेल्या सिकंदर शेख याने अखेर यावेळी महाराष्ट्र केसरीचा किताब पटकवलाच. पुणे जिल्ह्यातील फुलगाव इथं सुरु असलेल्या महाराष्ट्र केसरी कुस्ती स्पर्धेत त्याने बाजी मारत हा किताब पटकावला आहे. गतविजेता शिवराज राक्षे याला त्याने चितपट केले आहे.
महाराष्ट्र केसरी कुस्ती स्पर्धेचा अंतिम सामना पार पडला. माती विभागातून संदीप मोटेचा पराभव करुन सिंकदर शेख अंतिम फेरीत दाखल झाला होता, तर गादी विभागातून हर्षद कोकाटेला धुळ चारत शिवराज राक्षेने दुसऱ्यांदा महाराष्ट्र केसरी स्पर्धेची अंतिम फेरी गाठली होती.
सिकंदर शेख आणि शिवराज राक्षेमध्ये झालेल्या अटीतटीच्या लढतीत आस्मान दाखवत सिकंदर शेखने महाराष्ट्र केसरीची गदा पटकावली. गेल्या वर्षी झालेल्या महाराष्ट्र केसरी स्पर्धेत सिकंदर शेखला सेमी फायनलमध्ये पराभव स्विकारावा लागला होता.
