दौंड : दौंड तालुक्यातील 10 ग्रामपंचायत निवडणूक मतदान उद्या 5 तारखेला होणार आहे. मतदानाच्या 48 तास अगोदर संपूर्ण प्रचार बंद करावा असे निवडणूक आयोगाचे निर्देश आहेत. मात्र सध्या दौंड तालुक्यात हे आदेश पायदळी तुडवले जात असल्याचे समोर येत आहे.
काल 3 तारखेला सायंकाळी 5:30 नंतर संपूर्ण प्रचाराला बंदी असताना आज सकाळपासून व्हाट्सअप, फेसबुक आणि विविध सोशल मिडिया अ‍ॅपवर उमेदवारांचा प्रचार जोमात केला जात आहे. निवडणूक प्रचाराला बंदी असतानाही हे प्रकार सर्रास सुरु असून विविध उमेदवार आणि त्यांच्या कार्यकर्त्यांकडून आचार संहितेची ऐशी की तैशी केली जात आहे. त्यामुळे आता आचार संहिता अधिकारी, निवडणूक निर्णय अधिकारी यावर काही कारवाई करणार का ? की सोशल मिडीयावर प्रचार करण्यास मुभा ठेवण्यात आली आहे ? असा सवाल सर्वसामान्य नागरिक विचारू लागले आहेत.
निवडणुकीवेळी विविध प्रतिबंध लावले जातात. आचार संहिता नियमावली दिली जाते मात्र त्याचे पालन कुणीच करताना दिसत नाही आणि अधिकारीही मूग गिळून गप्प बसतात. त्यामुळे या निवडणूकांना आचार संहिता आहे की नाही, आणि असेल तर आचार संहिता मोडणाऱ्यांवर काय कारवाई केली असा सवाल नागरिकांकडून उपस्थित केला जात आहे.
