शिरूर : शिरुर हवेलीचे राष्ट्रवादी काँग्रेस पक्षाचे आमदार अशोक पवार यांना जीवे मारण्याचे धमकीचे पत्र मिळाले असून त्यांना व त्यांच्या परिवाराला यात धमकी देण्यात आली आहे. या पत्रात नगरसेवक, उद्योजक प्रकाश धारिवाल यांच्या नावाचाही उल्लेख करण्यात आला आहे.
शिरूर-हवेलिचे आमदार अशोक पवार यांनी त्यांना हे धमकीचे पत्र मिळाल्याचे त्यांनी सांगितले असून यात एक माजी नगरसेवक मल्लाव याचा संदर्भ देण्यात आल्याने शिरूर मधील वातावरण तप्त झाले आहे.
अशोक पवार यांच्या मार्गदर्शनाखाली व उद्योजक प्रकाश धारिवाल यांच्या नियोजनाने नुकतेच शिरूर च्या नगरपालिकेच्या इमारतीचे आलिशान बांधकाम करण्यात आले आहे, या इमारतीचे उदघाटन उपमुख्यमंत्री अजित पवार यांच्या हस्ते करण्यात आले आहे. शिरूर चा विकास झपाट्याने वाढत असल्याने काहींच्या पोटात दुखत असून त्यामुळे हे लोक असले भ्याड कृत्य करत असल्याचे आमदार अशोक पवार यांनी सांगितले. गृहविभागाने हे कोण लोक आहेत हे शोधून काढून त्यांच्यावर योग्य ती करवाई करावी अशी मागणी आमदार पवार यांनी केली आहे.
