दौंडमध्ये धारदार शस्त्राने वार करून तरुणाचा खून; आईच्या विनयभंगाचा बदला

अब्बास शेख

दौंड : सोनवडी (ता. दौंड) येथे जुन्या वादातून एका ३१ वर्षीय तरुणाची धारदार शस्त्राने वार करून हत्या करण्यात आल्याची धक्कादायक घटना १७ नोव्हेंबर रोजी मध्यरात्री घडली. अरुण अनिल पवार (वय ३१, रा. सोनवडी) असे खून झालेल्या तरुणाचे नाव आहे. या प्रकरणी दौंड पोलिसांनी दोघांविरुद्ध खुनाचा गुन्हा दाखल करून त्यांना अटक केली आहे.

पोलिसांनी दिलेल्या माहितीनुसार, आरोपी दिनेश विजय पवार (वय २०) याच्या मनात त्याच्या आई सोबत मागील दोन ते अडीच महिन्यांपूर्वी घडलेल्या कथित विनयभंगाच्या घटनेवरून अरुण पवार याच्याविषयी राग होता. याच रागातून दिनेश पवार आणि रुपेश मिथुन राठोड (दोघे रा. सोनवडी) यांनी संगनमत करुन १७ नोव्हेंबर रोजी रात्री साडेबारा वाजण्याच्या सुमारास सोनवडी गावच्या हद्दीतील कॉर्डलाईन ते पवार पॅलेस रोडवर अरुण पवार याला एकटे गाठून त्याच्या चेहऱ्यावर व डोक्यावर धारदार शस्त्राने गंभीर वार करण्यात आले. या हल्ल्यात गंभीर जखमी झालेल्या अरुणचा मृत्यू झाला.

या प्रकरणी सुनील अनिल पवार यांच्या फिर्यादीवरून दौंड पोलीस स्टेशनमध्ये गुन्हा दाखल करण्यात आला आहे. दोन्ही आरोपींना अटक करण्यात आली असून पुढील तपास पोलीस निरीक्षक हेमंत शेडगे यांच्या मार्गदर्शनाखाली पोलीस उपनिरीक्षक ए.एम. बिद्री करीत आहेत.