दौंड प्रतिनिधी : पुणे जिल्हा मध्यवर्ती सहकारी बँकेच्या संचालक निवड प्रक्रियेचा पहिला भाग म्हणून विविध तालुक्यांमधून प्रतिनिधी पाठवायची प्रथा आहे. हेच प्रतिनिधी पुढे संचालक निवडीसाठी मतदान प्रक्रिया पूर्ण करतात. गेल्या चाळीस वर्षांपासून पुणे जिल्हा मध्यवर्ती सहकारी बँकेला माजी आमदार रमेश थोरात हे संचालक म्हणून निवडून गेले आहेत. मात्र यावेळी त्यांना विद्यमान आमदार राहुल कुल यांनी मोठे आव्हान उभे केले आहे.
जिल्हा बँकेच्या संचालक पदासाठी होणाऱ्या या निवडणुकीत दौंड तालुक्यातून कुल, थोरात या दोन्ही गटाकडून आपणच प्रतिनिधी संख्येत पुढे असल्याचे दावे प्रतिदावे केले जात आहेत मात्र राहुल कुल यांची रणनीती पाहता रमेश थोरात यांना ही निवडणूक सोपी राहिली नसल्याचे दिसत आहेत. ज्या सोसायटीवर प्रशासक आहेत त्याठिकाणी थेट सभासदांनी मतदान करुन कुल यांचा प्रतिनिधी निवडल्याने कुल यांचे पारडे जड केले आहे तर थोरात यांच्या हक्काच्या काही सोसायटीचे प्रतिनिधी हे राहुल कुल यांच्या मर्जीतले निवडून गेल्याने थोरात गटाची धाकधूक वाढली आहे.
मागच्या बातमीत आपण वाचले होते की कुल आणि थोरात यांची २००७ साली होणारी थेट लढत कशाप्रकारे ऐनवेळी रोखली गेली होती यावेळी मात्र राहुल कुल हे भाजप तर रमेश थोरात हे राष्ट्रवादी (अप) पक्षात असल्याने या ठिकाणी रुजवात हा विषय गौण असल्याचे बोलले जात आहे. एकंदरीतच विद्यमान आमदार राहुल कुल यांनी जिल्हा बँकेच्या निवडणुकीसाठी मोठ्या प्रमाणावर प्रतिनिधिंची जमवाजमव केल्याने थोरात गटात चिंतेचे वातावरण दिसत आहे. नेमके कुणाकडे किती बलाबल हे लवकरच स्पष्ट होणार असून कुल यांच्या गुप्त रणनीतीमुळे थोरात गटाला सहज वाटणारी निवडणूक अवघड होत चालली आहे.
