केडगाव, दौंड : चौफुला ते सुपा मार्गावरील घाटात एसटी बसचा भीषण अपघात होऊन बस दोन ते तीन पलट्या घेत दरीत कोसळल्याची घटना बुधवार, दि. १६ सप्टेंबर २०२६ रोजी सकाळी आठ वाजण्याच्या सुमारास घडली. या अपघातात बसमधील विद्यार्थ्यांसह अनेक जण जखमी झाले तर काहींना गंभीर दुखापत झाली. या बस अपघात प्रकरणी बस चालकावर गुन्हा दाखल करण्यात आली असून जखमी मुलांची नावे समोर आली आहेत.
चौफुला ते सुपा मार्गावरील घाटातून एसटी बस क्रमांक एमएच २० बीसी ३१२१ जात असताना चालकाचा बसवरील ताबा सुटला. त्यामुळे बस मागे उताराला येत दरीत कोसळली आणि दोन ते तीन पलट्या घेत अपघात झाला. या दुर्घटनेत फिर्यादी आर्या इंद्रभान शितोळे (वय १५, रा. पडवी, ता. दौंड) यांच्यासह विराज शितोळे, श्री टिळेकर, वेदांत शितोळे, रिंयाश लाड, ऐश्वर्या पितळीया, रोहीत पितळीया, शुवांश शितोळे, स्वरा शितोळे तसेच इतर नऊ विद्यार्थी जखमी झाले.
या प्रकरणी बसचालक राहुल त्रिंबक मडावी याच्याविरुद्ध यवत पोलीस ठाण्यात गुन्हा दाखल करण्यात आला आहे. चालकाने हयगयीने व अविचाराने तसेच वाहतूक नियमांकडे दुर्लक्ष करून बस चालविल्याने अपघात झाल्याचे फिर्यादीत नमूद करण्यात आले आहे. अपघातात विद्यार्थ्यांना दुखापत होण्याबरोबरच एसटी बसचेही नुकसान झाले आहे. या प्रकरणी भारतीय न्याय संहिता कलम २८१, १२५ (अ), १२५ (ब), ३२४ (४) तसेच मोटार वाहन कायदा कलम १३४, १७७ अन्वये गुन्हा दाखल करण्यात आला आहे.
गुन्हा दाखल करण्याची कार्यवाही पोलीस हवालदार भोर यांनी केली असून, पुढील तपास सहाय्यक पोलीस निरीक्षक कदम करीत आहेत.
