अब्बास शेख
केडगाव, दौंड : दौंड तालुक्यातील पडवी हद्दीमध्ये असणाऱ्या सुपे घाटाच्या पहिल्या वळणावर शाळकरी मुलांची एस टी बस पलटी होऊन भीषण अपघात घडला आहे. या बस मध्ये साधारण २५ ते ३० विध्यार्थी होते. सर्वांचे वय ६ ते १४ दरम्यान असल्याची माहिती मिळत आहे. अपघातामध्ये सात विद्यार्थ्यांना जास्त मार लागल्याने त्यांना चौफुला येथील हर्ष हॉस्पिटल येथे भर्ती करण्यात आले असून यातील दोन विद्यार्थ्यांना लोणीकाळभोर येथील खाजगी हॉस्पिटलमध्ये दाखल करण्यात आले आहे. सर्व विद्यार्थ्यांची प्रकृती व्यवस्थित असून पालकांनी घाबरून जाऊ नये असे आवाहन करण्यात आले आहे.
दौंड तालुक्याच्या विविध गावांतील शाळकरी मुले चौफुला येथून बारामती येथे असणाऱ्या प्रतिष्ठित स्कुलमध्ये विशेष एस.टी बस ने ये जा करत असतात. आज बुधवार दिनांक १६ सप्टेंबर रोजी सकाळी साधारण ८ च्या दरम्यान ही एस टी बस चौफुला येथून निघून सुपे घाटात पोहोचली मात्र घाटाच्या पहिल्याच वळणावर ही बस पुढे जात असताना अचानक मागे येऊ लागली असे प्रत्यक्षदर्शी सांगत असून मागे येत असताना ही बस खोल खड्ड्यात कोसळून हा भिषण अपघात घडला. एस टी बस ची अवस्था पाहून पालकांमध्ये भीतीचे वातावरण निर्माण झाले होते.
घटनेची माहिती मिळताच यवत पोलिसांनी घटनास्थळी पोहोचत स्थानिक नागरिकांच्या मदतीने जखमी विद्यार्थ्यांना रुग्णालयात दाखल केले असून यात सात विद्यार्थ्यांना मुक्का मार लागला असून अन्य विद्यार्थी सुखरूप आहेत तर बस मधील वाहकलाही यात किरकोळ मार लागला असल्याची माहिती मिळत आहे.
