अब्बास शेख
दौंड : दौंड शहरातील डिफेंस कॉलनी परिसरात एका महिलेच्या गळ्यावर चाकू फिरवून जीवे मारण्याचा प्रयत्न केल्याची धक्कादायक घटना १९ ऑगस्ट रोजी रात्री साडेआठच्या सुमारास घडली. या प्रकरणी महिलेच्या तक्रारीवरून तिचा पती आणि त्याच्या मित्राविरुद्ध दौंड पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी महिला आणि आरोपी विशाल प्रकाश जाधव यांचा विवाह २०१८ साली झाला होता. विशाल याच्या दारूच्या व्यसनामुळे दोघांमध्ये वारंवार वाद होत असल्याने २०२२ पासून ते विभक्त राहत होते. त्यानंतर फिर्यादी आपल्या आई-वडिलांसोबत राहू लागल्या.
१९ ऑगस्ट रोजी रात्री सुमारे आठच्या सुमारास फिर्यादी आपल्या मुलासह आणि मैत्रिणीसोबत दौंडकडे जात असताना विशाल प्रकाश जाधव व त्याचा मित्र ऋषी अशोक डोके हे वाहनावरून तेथे आले. दोघांनी फिर्यादीशी बोलण्याचा प्रयत्न केला. त्यावेळी ऋषी डोके याने हातातील रुमाल फिर्यादीच्या तोंडाला लावण्याचा प्रयत्न केला त्यावेळी फिर्यादीने त्यास प्रतिकार केला असता विशाल जाधव याने कमरेला लावलेला चाकू काढून जीवे मारण्याची धमकी दिली आणि चाकूने फिर्यादीच्या गळ्यावर वार केले. या हल्ल्यात फिर्यादीच्या गळ्यावर जखम झाली.
घटनेदरम्यान फिर्यादीने आरडाओरड केल्यानंतर आजूबाजूचे नागरिक घटनास्थळी धावून आले. त्यांनी जखमी महिलेला वाहनातून रुग्णालयात दाखल करून उपचार करण्यात आले. या प्रकरणी फिर्यादी प्रियांका उमेश गायकवाड यांच्या तक्रारीवरून विशाल प्रकाश जाधव (रा. गोवागल्ली, दौंड) आणि ऋषी अशोक डोके (रा. वडारपुर, ता. मुर्तिजापूर, जि. अकोला) यांच्याविरुद्ध दौंड पोलीस ठाण्यात गुन्हा दाखल करण्यात आला आहे.
या प्रकरणाचा पुढील तपास पोलीस निरीक्षक हेमंत शेडगे यांच्या मार्गदर्शनाखाली सहायक पोलीस निरीक्षक सपाटे करीत असून, गुन्हा दाखल करण्याची कार्यवाही ग्रेड पोलीस उपनिरीक्षक खाडे यांनी केली आहे.
