दौंड : यवत पोलीस ठाण्याच्या हद्दीत अवैध दारू व्यवसायाविरोधात विशेष मोहीम राबवत पोलिसांनी मोठी कारवाई केली. या कारवाईत एकाच दिवशी महाराष्ट्र दारूबंदी अधिनियमांतर्गत ६ गुन्हे दाखल करण्यात आले असून ८५,७१० रुपये किमतीचा मुद्देमाल जप्त करण्यात आला आहे.
पोलीस अधीक्षक, पुणे ग्रामीण, अपर पोलीस अधीक्षक (बारामती विभाग) तसेच दौंड उपविभागीय पोलीस अधिकाऱ्यांच्या मार्गदर्शनाखाली ही मोहीम राबविण्यात आली. २ ऑगस्ट रोजी नांदूर, यवत, कानगाव आणि डुबेवाडी परिसरात अवैध दारू विक्री तसेच गावठी हातभट्टी दारू निर्मिती करणाऱ्यांवर समन्वित धडक कारवाई करण्यात आली.
कारवाईदरम्यान नांदूर येथून ३१५ लिटर गावठी हातभट्टी दारू, यवत येथील हॉटेल परिसरातून विविध ब्रँडच्या देशी व विदेशी मद्याच्या बाटल्या, कानगाव येथून देशी मद्याच्या बाटल्या तसेच डुबेवाडी येथे हातभट्टी दारू निर्मितीसाठी वापरण्यात येणारी भट्टी, लोखंडी बॅरल आणि सुमारे १,००० लिटर कच्चे रसायन जप्त करण्यात आले. याशिवाय कानगाव येथून विविध प्रकारच्या देशी-विदेशी मद्याच्या बाटल्याही जप्त करण्यात आल्या.
यवत पोलीस ठाण्याच्या हद्दीत अवैध दारू व्यवसाय, हातभट्टी दारू निर्मिती आणि विक्री करणाऱ्यांविरोधात यापुढेही कठोर व सातत्यपूर्ण कारवाई सुरू राहणार असल्याचे पोलिसांनी स्पष्ट केले आहे. तसेच नागरिकांनी आपल्या परिसरात सुरू असलेल्या अशा कोणत्याही अवैध व्यवसायाची माहिती तात्काळ यवत पोलिसांना देऊन सहकार्य करण्याचे आवाहन पोलीस निरीक्षक संतोष तासगावकर यांच्यावतीने करण्यात आले आहे.
