पाटस : आषाढी एकादशीचे औचित्य साधत जिल्हा परिषद प्राथमिक शाळा, शितोळे वस्ती येथे शुक्रवारी दि.२४ जुलै रोजी ‘बाल दिंडी’ सोहळा मोठ्या उत्साहात आणि भक्तीमय वातावरणात संपन्न झाला. विठ्ठल-रुक्मिणी, वारकरी आणि संतांच्या वेषातील लहानग्या विद्यार्थ्यांनी टाळ-मृदंगाच्या गजरात पालखी सोहळ्यात सहभागाने परिसरातील वातावरण भक्तिमय बनून गेले होते.
शाळेच्या परिसरातून काढण्यात आलेल्या दिंडीत विद्यार्थ्यांनी अभंग, भजन आणि विठ्ठल नामाचा गजर करत वारकरी परंपरेचा आनंद लुटला. यावेळी विद्यार्थ्यांनी पारंपरिक वेशभूषा परिधान करून महाराष्ट्राच्या समृद्ध वारकरी संस्कृतीचे दर्शन घडविले. पालखी सोहळ्यामुळे संपूर्ण परिसरात उत्साहाचे आणि भक्तीचे वातावरण निर्माण झाले होते.
या उपक्रमाच्या माध्यमातून विद्यार्थ्यांना पुस्तकी ज्ञानाबरोबरच महाराष्ट्राच्या सांस्कृतिक परंपरा, वारकरी संप्रदायाची मूल्ये, भक्तीभाव, वृक्ष जोपासना ,शिस्त आणि सामाजिक एकात्मतेचे धडे देण्याचा प्रयत्न करण्यात आला. शाळेच्या शिक्षकांनी केलेले उत्कृष्ट नियोजन, विद्यार्थ्यांचा उत्साह आणि शिस्तबद्ध सहभाग यामुळे हा सोहळा विशेष आकर्षणाचा ठरला. विद्यार्थ्यांमध्ये संस्कार, सांस्कृतिक जाणीव आणि अष्टपैलू व्यक्तिमत्त्व विकासासाठी जिल्हा परिषद शाळेचे शिक्षक सातत्याने विविध उपक्रम राबवत असून त्यांचे हे कार्य कौतुकास्पद असल्याची भावना उपस्थितांनी व्यक्त केली.
या कार्यक्रमासाठी मुख्याध्यापिका सौ.अश्विनी सोनवणे, सह शिक्षिका सौ. सलमा तांबोळी तसेच अंगणवाडी शिक्षकवृंद आणि शाळा व्यवस्थापन यांनी विशेष परिश्रम घेतले. त्यांच्या प्रयत्नांमुळे बाल दिंडीचा सोहळा अतिशय उत्साही, शिस्तबद्ध आणि भक्तीमय वातावरणात पार पडला. ग्रामीण भागातील शिक्षणासोबत संस्कृतीची जपणूक करणारा हा उपक्रम अनेकांसाठी प्रेरणादायी ठरला.
