दौंड : दौंड नगरपालिकेचे विद्यमान नगरसेवक शहानवाज खान यांचे जात प्रमाणपत्र मा.जात पडताळणी समिती, पुणे यांनी वैध (Valid) ठरविले आहे. या प्रकरणात कायदेशीर बाजू यशस्वीपणे मांडल्याबद्दल नागरिक हित संरक्षण मंडळाचे नगरसेवक आणि दौंड तालुका ॲडव्होकेट बार असोसिएशनच्या वकील बांधवांकडून प्रसिद्ध वकील ॲड. फिरोज बाबुलाल शेख यांचा विशेष सत्कार करण्यात आला.
शहानवाज खान हे दौंड येथील सार्वत्रिक निवडणुकीत नागरिक हित संरक्षण मंडळ, भाजप, आर.पी.आय. आघाडी आणि पी.आर.पी. गटातर्फे निवडून आले आहेत. त्यांच्या जात प्रमाणपत्राबाबत पडताळणी समितीकडे सुनावणी सुरू होती. या अतिशय महत्त्वाच्या कायदेशीर लढाईत ॲड. फिरोज बाबुलाल शेख यांनी शहानवाज खान यांच्या वतीने भक्कम पुरावे आणि युक्तिवाद सादर केला. त्यांच्या कायदेशीर कौशल्यामुळे जात पडताळणी समितीकडून हे प्रमाणपत्र वैध असल्याचा अंतिम निकाल आला.
या यशाबद्दल दौंड न्यायालय परिसरात एका विशेष कार्यक्रमाचे आयोजन करण्यात आले होते. याप्रसंगी दौंड तालुका ॲडव्होकेट बार असोसिएशनच्या पदाधिकाऱ्यांनी ॲड. फिरोज शेख यांचे पुष्पगुच्छ देऊन अभिनंदन केले व त्यांचा जाहीर सत्कार केला. या निकालामुळे शहानवाज खान यांचे नगरसेवकपद अबाधित राहिले असून, त्यांच्या कार्यकर्त्यांमध्ये उत्साहाचे वातावरण आहे.
