पुणे : गुटखा व्यवसाय करणाऱ्यांवर मकोका लागू करता येईल, अशी माहिती मुख्यमंत्री देवेंद्र फडणवीस यांनी नागपूर हिवाळी अधिवेशनावेळी विधानसभेत दिली होती. त्यानुसार गुटखा उत्पादन, साठवणूक, वाहतूक, वितरण व विक्री करणाऱ्या संघटित साखळीवर कठोर कारवाई करण्यासाठी अन्न व औषध प्रशासन अत्यंत महत्त्वपूर्ण पाऊल टाकत आहे, असे प्रतिपादन मंत्री नरहरी झिरवाळ यांनी केले आहे.
गुटखा, तंबाखू किंवा निकोटीनयुक्त पानमसाला तसेच तत्सम तंबाखू-मिश्रित प्रतिबंधित अन्नपदार्थांचे उत्पादन, साठवणूक, वाहतूक, वितरण व विक्री करणाऱ्या संघटित नेटवर्क्सविरुद्ध पात्र प्रकरणांत महाराष्ट्र संघटित गुन्हेगारी नियंत्रण अधिनियम, १९९९ म्हणजेच मकोका लागू करण्याबाबत सर्व क्षेत्रीय अधिकाऱ्यांना अन्न व औषध प्रशासन आयुक्त तुकाराम मुंढे यांनी स्पष्ट आदेश दिले आहेत.
गुप्तपणे गुटखा विक्री, साठवणूक, वाहतूक व्यवसाय करणाऱ्यांवर आता मोक्का ची कारवाई होणार आहे. त्यामुळे जर कोणी हे प्रतिबंधित पदार्थ आपल्या जवळ बाळगले तर त्यांना कायमचीच अद्दल घडणार आहे. गुटखा व्यवसाय करणारे अनेक दुकानदार, व्यापारी आता शासकीय यंत्रणांच्या रडारवर असून आता याची पहिली शिकार कोण होणार याकडे अनेकांचे लक्ष लागले आहे.
