दौंड : दौंड सब जेलला घेऊन जाताना एका गुन्ह्यातील आरोपी यवत पोलिसांशी झटापट करुन फरार झाला होता. यानंतर यवत पोलिस आणि स्थानिक गुन्हे शाखेच्या पथकाने सदर आरोपीला आंध्रप्रदेश येथे जाऊन त्याचा मागमूस काढत मोठ्या शिताफिने पकडून त्याला जेलचा रस्ता दाखवला आहे.
दिनांक १/६/२०२६ रोजी दौंड शहरात ही घडली होती. यवत पोलीस स्टेशन येथे दाखल असलेल्या एका गुन्ह्यात आरोपी व्यंकटेश नान तरपतैया (वय ३० वर्षे, रा.येल्लूर विजयवाडा राज्य – आंधप्रदेश) याचा सहभाग निष्पन्न झाल्याने त्यास अटक करण्यात आली होती. त्यानंतर त्यास त्याच दिवशी सायंकाली ८:०० च्या सुमारास दौंड सबजेल येथे जमा करण्याकामी नेण्यात आले होते. यावेळी आरोपीला सबजेलला जमा करण्यापूर्वी आवश्यक असलेल्या वैद्यकीय तपासणीच्या प्रमाणपत्राची झेरॉक्स प्रत काढण्यासाठी यवत पोलिसांनी दौंड पोलीस स्टेशन समोर वाहन थांबवले.
यावेळी पोलिस हवालदार विकास कापरे हे झेरॉक्स प्रत आणण्यासाठी वाहनातून खाली उतरले तर पोलिस कॉन्स्टेबल किरण तुपे हे आरोपीजवळ वाहनात बसून राहिले. याच संधीचा फायदा घेऊन अटक आरोपी व्यंकटेश नान तरपतैया याने अचानक वाहनाचा दरवाजा उघडून पळ काढला. त्यावेळी पो.कॉ. किरण तुपे यांनी पाठलाग करून त्यास अडविण्याचा प्रयत्न केला असता सदर आरोपीने किरण तुपे यांना जोरात हिसका देऊन खाली पाडले आणि तो तेथून पसार झाला.
या घटनेची माहिती मिळताच पोलिस हवालदार विकास कापरे तेथे आले व आरोपीचा शोध सुरु केला. यानंतर त्यांनी या घटनेबाबत दौंड व यवत पोलीसांना कळविले. त्यानंतर शोधाशोध करूनही आरोपी सापडला नाही त्यामुळे सदर घटनेबाबत विकास कापरे यांनी दौंड पोलीस स्टेशन येथे आरोपीने कायदेशीर रखवालीतुन पलायन केलेबाबत गुन्हा दाखल केला.
दुसऱ्या राज्यात जाऊन आरोपीला पकडले – आरोपी पसार झाल्यानंतर यवत पोलिसांनी वरिष्ठांच्या मार्गदर्शनाखली विविध पथके तयार करत आरोपीचा शोध सुरु केला. यावेळी यवत पोलिस आणि स्थानिक गुन्हे शाखा यांच्या पोलिस पथकाने आंध्रप्रदेश येथे जाऊन आरोपी ज्या ज्या भागात जाऊ शकतो अश्या सर्व ठिकाणी आणि त्याच्या गावात शोधाशोध करत त्याच्या सर्व बाबींवर लक्ष केंद्रित केले. या सर्व व्युह रचनेला अखेर यश येऊन दि. ३ जून रोजी सदर आरोपी पोलिस पथकाच्या जाळ्यात अलगद अडकला आणि त्याला त्याच्या गावातून मोठ्या शिताफिने यवत पोलिस आणि स्थानिक गुन्हे शाखेने जेरबंद केले.
सदरची कारवाई ही पुणे ग्रामिण पोलीस अधीक्षक संदीपसिंह गिल, गणेश बिरादार (अपर पोलीस अधिक्षक बारामती) बापुराव दडस (उपविभागीय पोलीस अधिकारी दौंड) यांच्या मार्गदर्शनाखाली स्थानिक गुन्हे शाखेचे पोलीस निरीक्षक प्रमोद क्षिरसागर, यवत पोलीस स्टेशनचे पोलीस निरीक्षक नारायण देशमुख, पोलीस उपनिरीक्षक मारोती मेतलवाड,पो.हवा. गुरूनाथ गायकवाड, पो.हवा.संदीप देवकर,” पो.हवा. महेंद्र चांदणे, पो .हवा. विकास कापरे, पो हवा. दत्ता काळे, पो.कॉ. मारूती बाराते, पो .कॉ. किरण तुपे, पो.कॉ. सचिन गुंड, होम. महेश कांबळे आणि स्थानिक गुन्हे शाखेचे स.फौजदार सचिन घाडगे पो.हवा. अजित भुजबळ यांच्या पथकाने केली आहे.
