केडगाव : केडगाव नजिक धुमळीचामळा (ता. दौंड) येथील शेतकरी कुटुंबातील समीर सतीश गायकवाड (वय २६) याची पुणे शहर पोलिस पदी निवड झाली आहे. ग्रामीण भागातील शेतकरी कुटुंबातील समीर याने अपार कष्ट, सुविधांचा अभाव, प्रतिकूल परिस्थितींवर जिद्दीने मात करीत पुणे शहर पोलिस दलात ओबीसी प्रवर्गातून निवड मिळवत संपूर्ण गावाचा अभिमान वाढवला आहे.
केडगाव येथील चैतन्य करिअर अकॅडमी येथील अभ्यासिकेमध्ये सातत्यपूर्ण अभ्यास करून लेखी आणि मैदानी परीक्षेत उत्कृष्ट कामगिरी केली. समीर गायकवाड यांनी कोणताही खासगी क्लास न घेता लेखी परीक्षेत १०० पैकी ८८ गुण व मैदानी परीक्षेत ५० पैकी ४१ गुण मिळवून त्यांनी एकूण १२९ गुण मिळवले.
घरची परिस्थिती जेमतेम असून आई – वडील दुध व्यवसाय व फुल शेती करीत आहेत. समीर ने केलेल्या सातत्यपूर्ण मेहनतीमुळेच त्याची पुणे शहर पोलिसपदी निवड झाली. यासाठी त्याची आई मीना व वडील सतीश गायकवाड, भाऊ तेजस यांसह कुटुंबीयांनी मोलाची मदत केली.
समीर ने प्राथमिक शिक्षण केडगाव येथील जिल्हा परिषद प्राथमिक शाळेत घेतले. त्यानंतर पाचवी ते बारावी माध्यमिक शिक्षण खुटबाव येथील भैरवनाथ विद्यालयात घेतले. उच्च माध्यमिक शिक्षण केडगाव येथील सुभाष बाबुराव कुल महाविद्यालयात पूर्ण केले. परिस्थितीवर जिद्दीने मात करत समीर हे यश मिळविले आहे.
