अब्बास शेख
दौंड : दौंड विधानसभा मतदारसंघातील दळणवळण अधिक सक्षम करण्यासाठी आमदार राहुल दादा कुल यांनी केलेल्या सततच्या पाठपुराव्याला राज्य सरकारच्या अर्थसंकल्पात मोठे यश मिळाले आहे. तालुक्यातील विविध ८ प्रमुख जिल्हा मार्गांच्या (प्रजिमा) खडीकरण आणि डांबरीकरणासाठी एकूण २५ कोटी रुपयांच्या निधीला प्रशासकीय मंजुरी मिळाली असून, यामुळे ग्रामीण भागातील रस्त्यांचा प्रश्न मार्गी लागणार आहे.
तालुक्यातील रस्त्यांची दुरवस्था आणि नागरिकांची गरज लक्षात घेऊन आमदार कुल यांनी सार्वजनिक बांधकाम विभागाकडे या कामांचा प्रस्ताव सादर केला होता. नुकत्याच झालेल्या राज्याच्या अर्थसंकल्पात या कामांसाठी भरीव तरतूद करण्यात आली आहे. त्याबाबत आमदार राहुल कुल यांनी राज्याचे मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री सुनेत्रा पवार व सार्वजनिक बांधकाम मंत्री शिवेंद्र राजे भोसले यांचे आभार मानले आहेत.
मंजूर झालेली कामे आणि निधीचा तपशील
१) पाटस ते रेल्वे गेट प्रजिमा – ५३ रस्ता सुधारणा करणे (अंतर ५ किमी) – ५ कोटी
२) नानगाव ते भीमानदी पूल प्रजिमा- ९८ रस्ता सुधारणा करणे (२ किमी) – २ कोटी
३) पाटस ते तामखडा प्रजिमा -१८३ रस्ता करणे (२.६ किमी) – ३ कोटी
४) सहकारनगर (राहु) ते टेळेवाडी चौक प्रजिमा-३८ रस्ता सुधारणा करणे (३.५ किमी) – ३ कोटी
५) पांढरेवाडी ते कुरकुंभ उर्वरित प्रजिमा – १७७ रस्ता सुधारणा करणे (१.५ किमी ) – २ कोटी
६) खोर गावठाण ते भांडगाव शिव प्रजिमा ६४ रस्ता सुधारणा करणे (२.३ किमी) – ३ कोटी
७) खोर गावठाण ते पिंपळाचीवाडी प्रजिमा ८३ रस्ता रस्ता सुधारणा करणे (३.५ किमी) – २ कोटी ५० लाख
८) मलठण ते राजेगाव प्रजिमा ७९ रस्ता सुधारणा करणे (२.५ किमी) – ४ कोटी ५० लाख
याबाबत आमदार राहुल कुल म्हणाले कि, दौंड तालुक्यातील ग्रामीण भागातील रस्ते दर्जेदार व्हावेत आणि शेतकऱ्यांच्या शेतीमालाची वाहतूक जलद व्हावी, नागरिकांचे दळणवळण सुकर व्हावे यासाठी आम्ही कटिबद्ध आहोत. या निधीतून होणाऱ्या कामांमुळे पाटस, राहु, कुरकुंभ, खोर आणि राजेगाव परिसरातील खराब रस्त्यांची समस्या दूर होईल. या कामांना लवकरच प्रत्यक्षात सुरुवात देखील होईल.
या निधीमुळे तालुक्यातील महत्त्वाच्या गावांना जोडणारे मुख्य रस्ते आता मजबूत होणार आहेत. प्रामुख्याने औद्योगिक वसाहत असलेल्या कुरकुंभ आणि शेतीप्रधान असलेल्या राहु – नानगाव पट्ट्यातील नागरिकांनी या निर्णयाचे स्वागत केले असून आमदार कुल यांचे आभार मानले आहेत.
