दिल्ली : धनगर बांधवांसाठी एक दुःखद बातमी असून धनगर समाजाची एस टी प्रवर्गातून आरक्षण मिळण्याबाबतची याचिका सुप्रीम कोर्टाने फेटाळून लावली आहे.
धनगर समाजाच्या वतीने याचिका कर्त्यांनी धनगर आणि धनगड हा शब्द एक असून त्यामुळे धनगर समाजाला एसटी प्रवर्गातून आरक्षण मिळावे अश्या आशयाची याचिका सुप्रीम कोर्टमध्ये दाखल केली होती. मात्र या अगोदर धनगर आणि धनगड हे वेगवेगळे असल्याचा निकाल मुंबई उच्च न्यायालयाने दिला होता. सुप्रीम कोर्टमध्ये दाखल करण्यात आलेली याचिका फेटाळून लावत मुंबई उच्च न्यायालयाचा निकाल सुप्रीम कोर्टाने कायम ठेवला आहे.
काय आहे नेमके प्रकरण – ज्यावेळी भारतीय राज्यघटना तयार झाली त्यावेळी अनुसूचित जमातींची सूची तयार करण्यात आली होती. यामध्ये संसदेने 1976 पर्यंत वेगवेगळ्या सुधारणा केल्या होत्या. धनगड आणि धनगर हे एकच असून महाराष्ट्रात धनगड ही जमात अस्तित्वात नाही तर धनगर हेच धनगड आहेत फक्त ‘ड’ चा ‘र’ असा फरक झाला आहे त्यामुळे धनगर समाजाला एसटीमधून आरक्षण मिळावे अशी मागणी याचिका कर्त्यांची होती.
ती याचिका मुंबई उच्च न्यायालयाने फेटाळून लावत धनगर समाजाला एसटी मधून आरक्षण मिळणार नाही असा निकाल उच्च न्यायालयाने दिला होता. मुंबई उच्च न्यायालयाच्या या निर्णयाविरोधात धनगर समाजाच्या याचिकाकर्त्यांनी सुप्रीम कोर्टामध्ये धाव घेतली होती. मात्र सुप्रीम कोर्टानेही उच्च न्यायालयाचा निकाल कायम ठेवला असल्याने धनगर समाजाच्या आरक्षणाच्या मागणीला मोठा धक्का बसला आहे.
