केडगाव : केडगाव रेल्वे स्थानकासमोरील मोकळ्या जागेतून मोटारसायकल चोरी करणाऱ्या आरोपीला यवत पोलिसांनी अटक केली असून, त्याच्याकडून विविध कंपन्यांच्या तब्बल ७ मोटारसायकली जप्त करण्यात आल्या आहेत. जप्त केलेल्या वाहनांची अंदाजे किंमत १ लाख १० हजार रुपये आहे. दिनांक ९ जुलै २०२६ रोजी सायंकाळी साडेपाचच्या सुमारास केडगाव रेल्वे स्थानकासमोरील मोकळ्या जागेतून काळ्या रंगाची हिरो कंपनीची स्प्लेंडर आय स्मार्ट मॉडेलची मोटारसायकल चोरीला गेली होती. याप्रकरणी यवत पोलीस ठाण्यात गुन्हा दाखल करण्यात आला होता.
गुन्ह्याचा तातडीने तपास करण्यासाठी यवत पोलिसांनी तपास पथक तयार करून अज्ञात आरोपीचा शोध सुरू केला. सीसीटीव्ही फुटेज तसेच गोपनीय बातमीदारांच्या माध्यमातून तपास करत असताना सदर मोटारसायकल चोरी ही बालाजी पांडुरंग लोखंडे, (रा. मुरुड, ता. लातूर, जि. लातूर) याने केल्याची खात्रीशीर माहिती पोलिसांना मिळाली. त्याला ताब्यात घेऊन चौकशी केली असता त्याने गुन्ह्याची कबुली दिल्याचे पोलिसांनी सांगितले. त्यानंतर आरोपीकडून चौकशीदरम्यान चोरीस गेलेल्या मोटारसायकलीसह विविध कंपन्यांच्या एकूण ७ मोटारसायकली हस्तगत करण्यात आल्या. या वाहनांची एकूण अंदाजे किंमत १,१०,००० असल्याचे पोलिसांनी नमूद केले आहे.
ही कारवाई पुणे ग्रामीणचे पोलीस अधीक्षक संदीपसिंह गिल, अपर पोलीस अधीक्षक गणेश बिरादार आणि उपविभागीय पोलीस अधिकारी बापूराव दडस यांच्या मार्गदर्शनाखाली यवत पोलीस ठाण्याचे पोलीस निरीक्षक संतोष तासगावकर, पोलीस उपनिरीक्षक मारोती मेतलवाड, पोलीस हवालदार संदीप देवकर, रॉकी देवकाते, अमोल काळे, महेंद्र चांदणे, पोलीस कॉन्स्टेबल धिरज जाधव, प्रतीक जगताप, अमोल भुजबळ, सचिन गुंड, मारुती बाराते, दिनेश लोणकर व विनित कुऱ्हाडे यांच्या पथकाने केली आहे. केडगाव परिसरात दुचाकी चोरीच्या घटनांना आळा घालण्यासाठी यवत पोलिसांची ही कारवाई महत्त्वाची मानली जात आहे.
