फलटण : सातारा जिल्ह्यातील फलटण उपजिल्हा रुग्णालयात कार्यरत असणाऱ्या महिला डॉक्टरने केलेल्या आत्महत्येच्या प्रकरणामुळे संपूर्ण राज्यात खळबळ माजली आहे. या प्रकरणात आता नवनवीन खुलासे होऊ लागल्याने पोलीस यंत्रणा खडबडून जागी झाली आहे. या प्रकरणातील मुख्य आरोपी पीएसआय बदने याला निलंबित करण्यात आले आहे.
अत्याचाराला त्रासलेल्या महिला डॉक्टरने आत्महत्या करण्यापूर्वी तिच्या हातावर आत्महत्येचे कारण लिहिल्याने मोठी खळबळ माजली आहे. दोन जणांनी आपल्यावर लैंगिक अत्याचार केला आणि मानसिक छळ केला असा गंभीर आरोप तिने आत्महत्येपूर्वी आपल्या हातावर लिहून ठेवला आहे.
या धक्कादायक प्रकाराने संपूर्ण जिल्हा पोलीस दलात मोठी खळबळ उडाली असून फलटण उपजिल्हा रुग्णालयातील महिला डॉक्टर आत्महत्या प्रकरणाची माहिती मुख्यमंत्री देवेंद्र फडणवीस यांनी सातारा जिल्हा पोलीस अधीक्षकांकडून घेतली असल्याचे समजत असून आरोपींवर कठोर कारवाई करण्याचे निर्देश देण्यात आले आहे. यानंतर पोलिसांकडून गोपाळ बदनेचे तत्काळ निलंबन करण्यात आले आहे.
आरोपिंना अटक करण्यासाठी पोलीस पथक रवाना.. साताराचे पोलीस अधीक्षक तुषार दोशी यांनी याबाबत माहिती देताना, पीएसआय गोपाल बदने याच्यावर गुन्हा दाखल करण्यात आला असून हा आरोपी पीएसआय फलटण ग्रामीण पोलीस स्टेशनचा असून दुसरा आरोपी प्रशांत बनकर हा पोलीस नसून तो सामान्य नागरिक आहे. या दोघांना अटक करण्यासाठी पोलीस पथक रवाना करण्यात आलेअसल्याची माहिती त्यांनी दिली आहे. मुख्यमंत्री देवेंद्र फडणवीस यांनी सुद्धा कडक कारवाईच्या सूचना दिलेल्या आहेत अशी माहिती त्यांनी दिली.
