परभणी : परभणी जिल्ह्यात असणाऱ्या सोनपेठ येथील नगर पालिकेच्या 10 नगर सेवकांनी राष्ट्रवादीत प्रवेश केला आहे. या प्रवेशाच्या कार्यक्रमाला राष्ट्रवादीचे नवाब मलिक, जयंत पाटील, मेहबूब शेख हे उपस्थित होते.
यावेळी नवाब मलिक यांनी देवेंद्र फडणवीस यांच्या ‛शरद पवार यांचे राजकारण संपले’ या विधानाचा खरपूस समाचार घेत काहीजण म्हणतात की आमच्याकडे चाणक्य आहे, मात्र तुमच्याकडे चाणक्य असला तरी आमच्याकडे तालमीतला बाप आहे असा प्रति हल्ला फडणवीस यांच्या त्या विधानावर चढवला आहे.
यावेळी मलिक यांनी बोलताना फडणवीस साहेब तुम्ही ज्या तालमीत शिकताय त्या तालमीचा, या राज्याचा आणि देशाचा उस्ताद शरद पवार यांच्या रूपाने आमच्याकडे आहे, तुमच्या पक्षातील लोक म्हणतात की राजकारणातील चाणक्य आमच्याकडे आहे, मात्र चाणक्याचा बाप आमच्या पक्षात आहे हे विसरू नका असा टोला नवाब मलिक यांनी फडणवीसांच्या विधानावर लगावला आहे.
राज्यात सध्या महाविकास आघाडी विरुद्ध भाजप असा राजकीय आखाडा रंगलेला आहे. नवाब मलिक यांनी समीर वानखेडे यांच्या कार्यपद्धतीवर टीका करून अनेक पुरावे सादर केल्यानंतर भाजप च्या अनेक नेत्यांनी वानखेडे यांना सपोर्ट करत महाविकास आघाडी आणि नवाब मलिकांना लक्ष केल्याचे दिसत आहे. या सर्व प्रकरणावर आज नवाब मलिकांनी राज्यात आम्ही कुणाला भिणार नाही, घाबरणार नाही आणि जे घाबरत होते ते सर्वजण इकडे तिकडे गेले असल्याचे सांगत चाणक्याचा बाप आमच्याकडे असल्याचा इशारा दिला आहे.
