Crime News
पुणे : शिरूर तालुक्यात एक धक्कादायक घटना उघडकीस आली असून त्यामुळे शिरूर परीसरात खळबळ माजली आहे. शिरूर तालुक्यातील कारेगाव येथे एका सहा ते सात महिन्याच्या मुलाचा मृतदेह विहिरीत आढळून आला असून या मुलाच्या नाका-तोंडावर कशानेतरी मारून त्याचे नाक फ्रॅक्चर करून नंतर त्याचा गळा दाबून खून करण्यात आला असल्याचे तपासात पुढे येत आहे.
मिळालेल्या माहितीनुसार ही घटना दि.१० नोव्हेंबर २०२३ रोजी सायंकाळच्या सुमारास ही घटना उघडकीस आली आहे. दि. १० नोव्हेंबर रोजी सायंकाळी ४ वाजण्याच्या अगोदर (नक्की वेळ माहित नाही) कारेगाव गावच्या हद्दीत पुणे ते अहमदनगर हायवे रोडलगत रमेश संभाजी जासुद (रा.चव्हाणवाडी, करडेरोड ता. शिरुर जि.
पुणे) यांच्या मालकीच्या शेतातील विहिरीत एक अनोळखी सहा ते आठ
महिन्याच्या बालकाचा मृतदेह आढळून आला आहे. कोणीतरी अज्ञात इसमाने कोणत्यातरी अज्ञात कारणावरून त्या बालकाच्या नाकावर कशानेतरी मारुन फ्रॅक्चर करुन त्याचा गळा दाबुन खुन केला आणि पुरावा नष्ट करण्याच्या उद्देशाने त्यास विहिरीतील पाण्यात टाकुन दिले होते.
खुनाची ही घटना उघडकीस आल्यानंतर रांजणगाव एमआयडीसी पोलीस चौकीचे पोलीस हवालदार वैजनाथ नागरगोजे यांनी याबाबत फिर्याद दिली असून त्यांच्या फिर्यादीवरून अज्ञात इसमावर खुनाचा गुन्हा दाखल करण्यात आला आहे. अधिक तपास पोसई रोकडे करीत आहेत.
