दौंड : सततच्या जाचाला कंटाळून विवाहितेने आत्महत्या केल्याची गंभीर घटना दौंड तालुक्यातील नंदादेवी येथे घडली आहे. याबाबत मृत विवाहित महिलेचा भाऊ रविंद्र आप्पासाहेब कित्तुरे (वय 33 वर्षे, व्यवसाय शेती रा. साळमळगेवाडी ता. जत जि. सांगली) यांनी फिर्याद दिली आहे. त्यांनी दिलेल्या फिर्यादीवरून 1) पांडुरंग बाळकृष्ण मेरगळ 2) प्रियवृत पांडुरंग मेरगळ (सावत्र मुलगा) 3) रामचंद्र बाळकृष्ण मेरगळ (दिर) 4) सतीबामाई रामचंद्र मेरगळ (भावजय), 5) पाडुरंग मेरगळ यांचा मित्र आबासो आटोळे (सर्व रा. नंदादेवी, ता दौंड, जि पुणे) या आरोपिंवर भारतीय न्याय संहितेच्या विविध कलमान्वये दौंड पोलिस ठाण्यात गुन्हा दाखल करण्यात आला आहे.
दौंड पोलिसांनी दिलेल्या माहितीनुसार फिर्यादी यांनी आपल्या फिर्यादीमध्ये, माझी मोठी बहीण गोकुळा आप्पासाहेब कित्तुर (लग्नानंतरचे नाव गोकुळा पांडुरंग मेरगळ, वय 41 वर्षे) हिचा विवाह पांडुरंग बाळकृष्ण मेरगळ याच्या सोबत दि. 02/07/2023 रोजी झाला होता. पांडुरंग मेरगळ याची पहिली पत्नी मयत झाल्याने त्याचे माझ्या बहिणीसोबत हे दुसरे लग्न होते. पांडुरंग मेरगळ याला पहिल्या पत्नीपासून एक मुलगी व एक मुलगा अशी अपत्ये आहेत. अशाप्रकारे माझी बहिण लग्नानंतर पती पांडुरंग मेरगळ व त्याच्या पहिल्या पत्नीच्या मुलांसह संसार करीत होती. परंतु लग्नानंतर सहा महिन्यातच डिसेंबर 2023 पासून पती-पत्नीमध्ये वाद-विवाद सुरू झाले.
बहिण गोकुळा ही माहेरी आलेनंतर आम्हाला सांगायची की, तिचा पती तिला सतत टोमणे मारायचा की, तू रोगीट आहेस, मनोरुग्ण आहेस, तुझे दवाखाण्याचा व गोळयांचा खर्च माझ्याकडून पेलवत नाही. तुझे माहेरचे लोकांकडुन पैसे आण असे म्हणुन तो वारंवार त्रास देत होता. तुझेबरोबर मला संसार करायचा नाही. तुला कोठे जायचे आहे, तिकडे जा. तसेच तो माझे बहिणीला मारहाण व शिविगाळ करीत असायचा. ती गर्भवती राहू नये म्हणून तिला जबरदस्तीने गर्भनिरोधक गोळ्या द्यायचा व गोळ्या नाही खाल्ल्यास शिविगाळ व मारहाण करायचा.
तसेच बहिणीचा सावत्र मुलगा प्रियवृत पांडुरंग मेरगळ, दिर रामचंद्र बाळकृष्ण मेरगळ, भावजय सतीबामाई रामचंद्र मेरगळ हे देखील माझे बहिणीला वेगवेगळ्या मार्गाने मानसिक त्रास देवून तिचे पतीला तिचेविरुध्द भडकावत असायचे. तसेच जेव्हा माझे बहिणीला तिचा पती पांडुरंग मेरगळ हा तू माहेरी निघून जा, असे सांगून रस्त्यावर हाकलून दयायचा त्यावेळी त्याचा मित्र आबासो आटोळे हा देखील पांडुरंग मेरगळ याला मदत करायचा. डिसेंबर 2023 ते दि. 09/05/2026 दरम्यान नंदादेवी ता. दौंड येथे माझे बहिणीचा पती पांडुरंग बाळकृष्ण मेरगळ याने माझी बहिण गोकुळा हिस वारंवार मारहाण व शिविगाळ करणे, वेळोवेळी तिला टोमणे मारून माहेरी निघून जा, असे म्हणून व विविध मार्गानी त्रास देवून तिचा शारीरिक व मानसिक छळ केला.
त्याला या कामात माझ्या बहिणीचा सावत्र मुलगा प्रियवृत पांडुरंग मेरगळ, दिर रामचंद्र बाळकृष्ण मेरगळ, भावजय सतीबामाई रामचंद्र मेरगळ व पांडुरंग मेरगळ यांचा मित्र आबासो आटोळे (सर्व रा. नंदादेवी, ता दौंड, जि पुणे) यांनी देखील पांडुरंग मेरगळ याची मदत करून माझे बहिणीचा शारीरिक व मानसिक छळ केलेला आहे. या सततच्या छळाला कंटाळून माझी बहिण गोकुळा हिने अखेर आत्महत्या करून स्वतःचे जीवन संपवले आहे. तरी वरील सर्वांनी माझ्या बहिणीचा शारीरिक व मानसिक छळ करून तिस आत्महत्येस प्रवृत्त केले असल्याची फिर्यादी रवींद्र कित्तुरे यांनी दौंड पोलिस ठाण्यात दिल्यानंतर वरील सर्व आरोपिंवर गुन्हा दाखल करण्यात आला आहे.पुढील तपास ग्रेस पोलिस सब इन्स्पेक्टर कुंभार हे करीत आहेत.
