दौंड : दौंड तालुक्यातील नानगाव येथे एक धक्कादायक घटना घडली आहे. शेळीला वाचविण्यासाठी गेलेल्या महिलेला विजेचा शॉक बसला तिला वाचवायला गेलेला तिचा पती सुद्धा विद्युत प्रवाहात चिटकून बसला अण या अपघातामध्ये शेळी, पत्नी आणि पती असा तिघांचाही मृत्यू झाला आहे.
आज बुधवारी सायंकाळी पाच वाजण्याच्या सुमारास ही घटना दुःखद घटना घडली आहे. मिळत असलेल्या माहितीनुसार, या घटनेमध्ये राजाराम बापूराव खळदकर आणि त्यांची पत्नी मनीषा राजाराम खळदकर (रा.नानगाव, ता.दौंड जि.पुणे) या दोघांचा मृत्यू झाला आहे. इलेक्ट्रिक मोटारीच्या पॅनल बॉक्सला करंट आल्याने तेथे चरत असलेली राजाराम खळदकर यांची शेळी त्यास चिकटली. तिला वाचवायला मनीषा खळदकर गेल्या मात्र त्याही या पॅनल बॉक्सला चिकटल्या.
हे सर्व दृश्य पाहून राजाराम खळदकर हे आपल्या पत्नीला वाचवायला धावत गेले मात्र ते सुद्धा या ठिकाणी चिकटून बसले अण या दुर्दैवी घटनेत शेळी तसेच मनीषा खळदकर आणि राजाराम खळदकर हे जागीच ठार झाले. ही भयंकर घटना नानगाव मध्ये समजताच संपूर्ण गावावर शोककाळा पसरली आहे.
राजाराम खळदकर यांना एक मुलगा आणि एक मुलगी असून दोघेही शालेय शिक्षण घेत आहेत. घडलेल्या घटनेमुळे सर्वत्र हळहळ व्यक्त होत आहे. अशीच एक घटना मागील वर्षी नानगाव जवळ असणाऱ्या दापोडी गावात घडली होती ज्यामध्ये पती, पत्नी आणि मुलगा असा तिघांचा मृत्यू झाला होता.
