बारामती : बारामती शहर पोलीसांनी धाडसी आणि नियोजनबद्ध कारवाई करत तब्बल १५ गुन्ह्यांमध्ये न्यायालयाने नॉन बेलेबल वॉरंट जारी केलेला सराईत फरार आरोपी शंकर उर्फ पोक्या प्रकाश आडके (रा. मळद, ता. बारामती, जि. पुणे) यास अखेर जेरबंद केले आहे. अनेक वर्षांपासून न्यायालयीन प्रक्रियेला सातत्याने चकवा देत पोलिस व न्यायालयीन यंत्रणेसमोर मोठे आव्हान निर्माण करणारा हा आरोपी अखेर बारामती शहर पोलिसांच्या जाळ्यात अडकला असून बारामती शहर पोलिसांच्या या धडाकेबाज कारवाईचे संपूर्ण परिसरात कौतुक केले जात आहे.
सदर आरोपीविरुद्ध बारामती शहर पोलीस स्टेशन, बारामती तालुका पोलीस स्टेशन तसेच वडगाव निंबाळकर पोलीस स्टेशन येथे गंभीर स्वरूपाचे विविध गुन्हे दाखल असून पंधरा गुन्ह्यांमध्ये न्यायालयाने त्याच्याविरुद्ध नॉन बेलेबल वॉरंट जारी केले होते.
विविध गुन्ह्यांमध्ये न्यायालयाने त्यास जामीन मंजूर केल्यानंतर आरोपीने न्यायालयीन प्रक्रियेपासून जाणीवपूर्वक पळ काढण्यास सुरुवात केली होती. न्यायालयाकडून वारंवार समन्स, नोटिसा तसेच वॉरंट बजावण्यात येऊनही आरोपी कोणत्याही सुनावणीस हजर राहत नव्हता. परिणामी संबंधित न्यायालयांनी त्याच्याविरुद्ध नॉन बेलेबल वॉरंट जारी केले होते. न्यायालयीन आदेशांचे सातत्याने उल्लंघन करणाऱ्या या आरोपीचा शोध घेण्यासाठी बारामती शहर पोलीस सातत्याने प्रयत्नशील होते.
दिनांक 24/05/2026 रोजी सकाळी 07:00 वाजता बारामती शहर पोलीसांना शंकर उर्फ पोक्या प्रकाश आडके हा दशविधी कार्यक्रमाकरिता आपल्या मूळ गावी आला असल्याची माहिती मिळाली. त्यामुळे पोलिस हवालदार टापरे, पोलीस शिपाई गिरीश नेवसे व पोलीस शिपाई वैभव मदने यांनी पोलिस निरीक्षक श्रीशैल चिवडशेट्टी यांच्या मार्गदर्शनाखाली तत्काळ पथक तयार करून संबंधित ठिकाणी धाव घेतली.
पोलीस पथक घटनास्थळी पोहोचताच आरोपीला पोलिसांची चाहूल लागली आणि त्याने चित्रपटातील थरारक दृश्याला मागे टाकेल अशा पद्धतीने स्वतःस अटक होऊ नये यासाठी थेट करा नदीच्या उंच भिंतीवरून नदीत उडी घेतली. यावेळी बारामती शहर पोलिसांनीही जीवाची पर्वा न करता त्याच्या पाठलाग सुरु ठेवला. नदीतून पळत सुटलेला आरोपी काही वेळातच नदीकाठची भिंत चढून जवळील दाट उसाच्या फडात शिरला. उंच वाढलेले उसाचे पीक, अरुंद पायवाटा आणि पूर्ण परिसरातील शांतता यामुळे आरोपीचा शोध घेणे हे पोलिसांसमोर मोठे आव्हान निर्माण झाले होते.
बारामती शहर पोलिसांनी स्थानिक नागरिकांची मदत घेत परिसरात कसून शोधमोहीम सुरू ठेवली. जवळपास दीड तास सुरू असलेल्या या थरारक शोधमोहीमेनंतर उसामध्ये संशयास्पद हालचाली दिसून आल्या. पोलिसांनी तात्काळ संपूर्ण परिसराला घेराव घालत अत्यंत शिताफीने आरोपीस पकडून ताब्यात घेतले. अनेक वर्षांपासून पोलिसांना आणि न्यायालयाला चकवा देणारा आरोपी अखेर बारामती शहर पोलिसांच्या धाडसी कारवाईसमोर निष्प्रभ ठरला.
सदर आरोपीविरुद्ध न्यायालयीन प्रक्रियेतील कागदपत्रे, वॉरंट अंमलबजावणी, न्यायालयीन समन्वय तसेच आरोपीचा सातत्याने पाठपुरावा करण्यात बारामती शहर पोलीस स्टेशनच्या महिला रणरागिनी पोलीस हवालदार सगुना आवटे व पोलीस हवालदार उमा कोकरे यांचा देखील अत्यंत मोलाचा सहभाग राहिला असून त्यांच्या मेहनतीमुळे सदर कारवाईस मोठी मदत झाली आहे.
