राहू, दौंड : दौंड तालुक्याच्या राहू येथे असणाऱ्या सोनवणेमळा या ठिकाणी विजेचा तीव्र धक्का बसून दोन सख्ख्या चुलत भावांचा दुर्दैवी मृत्यू झाला आहे. ही घटना बुधवार दि. १९ ऑगस्ट रोजी सकाळच्या सुमारास घडली आहे. ओम नितीन भोईटे (वय १८) आणि रोहित अनिल भोईटे (वय २१) अशी मृत्यू झालेल्या युवकांची नावे असून या घटनेने संपूर्ण राहू परिसर हादरला आहे.
मिळालेल्या माहितीनुसार, सकाळच्या वेळी ओम भोईटे याला राहत्या घरी अचानक विजेचा जोरदार शॉक बसला त्याला विजेचा धक्का बसल्याचे लक्षात येताच त्याचा चुलत भाऊ रोहित हा त्याला वाचविण्यासाठी धावत गेला. मात्र, मदतीला गेलेल्या रोहितलाही विजेचा जोरदार धक्का बसला. या दोन्ही मुलांना विजेचा धक्का बसल्याचे पाहून त्यांच्या आईने सुद्धा मदतीसाठी धाव घेतली. मात्र, यात त्या बालंबाल बचावल्या.
विजेचा धक्का बसल्याची माहिती कुटुंबियांना समजताच ओम आणि रोहित यांना तातडीने यवत येथील ग्रामीण रुग्णालयात उपचारासाठी दाखल करण्यात आले. तेथे वैद्यकीय तपासणी केल्यानंतर मात्र डॉक्टरांनी या दोन्ही भावांना मृत घोषित केले. दौंड तालुक्यात मागील काळात सुद्धा दापोडी, नानगाव येथे अशी घटना घडून पती,पत्नी आणि मुलाचा मृत्यू झाला होता तर मागील महिन्यात केडगाव येथेही विजेचा धक्का बसून एका युवकाचा मृत्यू झाला होता. नागरिकांनी विद्युत उपकरणे हाताळताना काळजी घेणे गरजेची असून अश्या दुःखद घटना घडू नये म्हणून उघड्या तारा, विद्युत मोटारी, बटणे चालू बंद करताना विशेष काळजी घेणे गरजेचे आहे.
