अब्बास शेख
दौंड : दौंड तालुक्यातील पारगाव येथे अत्यंत साध्या व कष्टकरी कुटुंबातील सख्ख्या चुलत भाऊ, बहिणीने जिद्द, संघर्ष आणि अथक परिश्रमाच्या जोरावर पोलिस सेवेत स्थान मिळवत प्रेरणादायी यश संपादन केले आहे. सलमा गणिभाई मुजावर (ठाणे शहर पोलीस) आणि अरबाज राजूभाई मुजावर (पिंपरी शहर पोलीस) अशी या भाऊ, बहिणीचे नाव असून त्यांच्या या यशामागे त्यांचा आणि त्यांच्या कुटुंबांचा अनेक वर्षांचा संघर्ष दडलेला आहे.
1972 साली भीषण दुष्काळ पडला आणि कुटुंबाची उपासमार होऊ लागली त्यामुळे वरील दोन्ही भाऊ, बहिणीचे आजोबा हसनभाई मुजावर यांनी आपल्या कुटुंबासह बारामती तालुक्यातील मुढाळे येथून पारगाव येथे स्थलांतर केले. हाताला मिळेल ते काम करत सालाने मोलमजुरी करून त्यांनी कुटुंबाचा गाडा ओढला. हालअपेष्टा, उपासमारी आणि अनिश्चितेतही त्यांनी कधी हार मानली नाही. हीच जिद्द पुढच्या पिढीतही कायम राहिली.
सलमाचे वडील गणिभाई मुजावर यांनी बांधकामावर बिगारी काम करत, ऊन, पावसात राबत आपल्या मुलीचे शिक्षण खंडित होऊ दिले नाही. दुसरीकडे, त्यांचे भाऊ राजूभाई मुजावर यांनी खाजगी कंपनीत नोकरी करत आपला मुलगा अरबाजच्या शिक्षणासाठी सतत प्रयत्न केले. घरची परिस्थिती अत्यंत कठीण, साधनसामग्री मर्यादित पण तरीही स्वप्न मात्र मोठी ठेवली. बिकट असलेल्या परिस्थितीतही सलमा आणि अरबाज या मुलांनी न डगमगता आपल्या वडिलांच्या कष्टांचे सोनं केलं आहे. अनेक अडथळे पार करत त्यांनी पोलिस सेवेत स्थान मिळवलं आणि कुटुंबाच्या संघर्षाला यशाची किनार दिली.
आज त्यांच्याया यशामुळे संपूर्ण गावात आनंदाचे वातावरण असून, सर्व स्तरातून त्यांचे कौतुक केले जात आहे. त्यांच्या डोळ्यातील स्वप्न आणि वडिलांच्या कपाळावरील घाम यांचा संगम म्हणजेच हे यश असल्याची भावना व्यक्त होत आहे. परिस्थिती कितीही कठीण असली, तरी जिद्द आणि मेहनतीच्या जोरावर यश नक्की मिळते याचे जिवंत उदाहरण सलमा आणि अरबाज मुजावर हे आहेत. त्यांचे यश हे अनेक तरुणांसाठी प्रेरणादायी ठरणार आहे.
