दौंड : दौंड तालुक्यातील यवत, कासुर्डी या ठिकाणी कोणतीही पदवी नसताना, औषधे विकण्याचा परवाना नसताना रुग्णांवर उपचार करुन त्यांना औषध आणि गोळ्या देणाऱ्या तोतया डॉक्टरला यवत पोलिसांनी गुन्हा दाखल करुन त्यास अटक केली आहे.
याबाबत खामगाव (ता.दौंड) येथील प्राथमिक आरोग्य केंद्रातील डॉ.आशिष शंकर शिरसे यांनी फिर्याद दिली असून त्यांच्या फिर्यादीवरून आरोपी ओमप्रकाश बन्सीलाल स्वर्णकर (रा.सदर बाजार, भिलवाडा, राजस्थान) याच्यावर गुन्हा दाखल करण्यात आला आहे.
पोलिसांकडून मिळालेल्या माहितीनुसार, सदर आरोपी इसमाने ॲलोपॅथीची वैद्यकीय पदवी संपादन केली नसताना, महाराष्ट्र मेडीकल कौन्सील या संस्थेची नोंदणी नसताना, औषधे विकण्याचा किंवा वापरण्याचा परवाना नसताना तसेच क्लिनीक चालविण्याचे प्रमाणपत्र नसताना गैर मार्गाने वैद्यकीय व्यवसाय चालू करून शासनाची, रुग्णांची फसवणूक व तोतयागिरी करून रुग्णांच्या जिवितास धोका पोहचविला असल्याने त्याच्या विरोधात यवत पोलिस ठाण्यात गुन्हा नोंदविण्यात आला आहे. पुढील तपास सहाय्यक पोलिस निरीक्षक सुवर्णा गोसावी या करीत आहेत.
