राहुल अवचर
देऊळगाव राजे : दौंड तालुक्यातील शिक्षकांसाठी शिक्षक दिनाच्या निमित्ताने प्रथमच वकृत्व स्पर्धेचे आयोजन करण्यात आले होते. इंस्पायर्ड विंग्स एज्युकेशन या संस्थेच्या वतीने या स्पर्धेचे सर्व नियोजन करण्यात आले होते. या स्पर्धा दौंड पंचायत समितीच्या सभागृहात नुकत्याच पार पडल्या.
स्पर्धेचे उद्घाटन संस्थेच्या अध्यक्षा वैशाली नागवडे यांच्या हस्ते करण्यात आले. स्पर्धेमध्ये प्राथमिक आणि माध्यमिक असे दोन गट करून यामध्ये 35 स्पर्धकांनी सहभाग घेतला होता. प्राथमिक गटामध्ये प्रथम क्रमांक पूजा दागोळे, द्वितीय क्रमांक विद्या पवळ, तर तृतीय क्रमांक सुजाता जाचक यांनी पटकवला.
माध्यमिक गटामध्ये प्रथम क्रमांक अशोक ढोले, द्वितीय क्रमांक कोमल वाघ, तर तृतीय क्रमांक दस्तगीर सय्यद यांनी मिळवला. कार्यक्रमाचे प्रास्ताविक संस्थेचे सचिव प्रशांत गिरमकर यांनी केले तर सूत्रसंचालन वर्षाराणी गायकवाड आणि आभार सुदर्शन गिरमकर यांनी मानले. यावेळी संस्थेचे उपाध्यक्ष राजेंद्र जगताप, खजिनदार मधुबाला जगदाळे आणि शिक्षकवृंद उपस्थित होते.
