पुणे | प्रतिनिधी
राष्ट्रवादी काँग्रेस पक्षाच्या महिला प्रदेशाध्यक्षपदी वैशाली नागवडे यांची अधिकृत नियुक्ती करण्यात आली आहे. पक्षाच्या अध्यक्षा सुनेत्रा पवार यांच्या हस्ते त्यांना नियुक्तीपत्र देण्यात आले. यावेळी राष्ट्रवादी चे प्रदेशाध्यक्ष सुनिल तटकरे यांसह अनेक मान्यवर उपस्थित होते. रुपाली चाकणकर यांच्या राजीनाम्यानंतर रिक्त झालेल्या या पदाची जबाबदारी अखेर वैशाली नागवडे यांच्याकडे सोपवण्यात आली आहे.
‘सहकारनामा’ ची १६ जून ची बातमी – https://sahkarnama.in/vaishali-nagvade-is-the-frontrunner-for-the-post-of-state-womens-wing-president/
विशेष म्हणजे, ‘सहकारनामा’ने याच विषयावर सुमारे महिनाभरापूर्वी “महिला प्रदेशाध्यक्षपदासाठी वैशाली नागवडे यांचे नाव आघाडीवर” या मथळ्याखाली वृत्त प्रसिद्ध केले होते. त्या वेळी वैशाली नागवडे यांच्या नावाची जोरदार चर्चा असल्याचे सहकारनामाने वृत्तातून सांगितले होते. आज झालेल्या अधिकृत नियुक्तीमुळे सहकारनामाचा अंदाज अचूक ठरल्याचे स्पष्ट झाले आहे.
वैशाली नागवडे या राष्ट्रवादी काँग्रेसच्या तळागाळातील सक्रिय नेत्या असून, त्यांनी यापूर्वी महिला संघटनेत विविध महत्त्वाची पदे भूषवली आहेत. आगामी स्थानिक स्वराज्य संस्थांच्या निवडणुकांच्या पार्श्वभूमीवर महिला संघटना अधिक मजबूत करण्याच्या उद्देशाने पक्षाने त्यांच्यावर ही महत्त्वाची जबाबदारी सोपवली असल्याचे मानले जात आहे.
पुणे जिल्ह्यातील दौंड तालुक्याला मिळाली संधी – वैशाली नागवडे या पुणे जिल्ह्यातील दौंड तालुक्यातील खामगाव येथील रहिवासी असून त्या सक्रिय, आक्रमक आणि अभ्यासू महिला नेत्या म्हणून ओळखल्या जातात. त्यांनी यापूर्वी महानंदा चे अध्यक्षपद, पक्षाच्या प्रदेश प्रवक्त्या, राष्ट्रवादी महिला काँग्रेसचे पुणे जिल्हाध्यक्षपद आणि प्रदेश सरचिटणीसपद देखील भूषवले आहे.
