दौंड : दौंड तालुक्यातील गिरीम येथील वायरलेस फाटा परिसरातील एका लॉजवर पोलिसांनी मध्यरात्री कारवाई करत अनैतिक व्यवसायाचा पर्दाफाश केला. या प्रकरणी दौंड पोलीस ठाण्यात गुन्हा नोंद करण्यात आला असून स्त्रिया व मुली अनैतिक व्यापार प्रतिबंध अधिनियम, १९५६ मधील कलम ३, ४ व ५ अंतर्गत गुन्हा दाखल करण्यात आला आहे.
पोलिसांनी दिलेल्या माहितीनुसार, ३० जुलै २०२६ रोजी पहाटे १२.४५ वाजण्याच्या सुमारास गिरीम गावच्या हद्दीतील वायरलेस फाटा, दौंड–पाटस रोडलगत असलेल्या ‘समाधान लॉज’ येथे छापा टाकण्यात आला. कारवाईदरम्यान संबंधित लॉजमधील एका खोलीत आरोपी स्वतःच्या आर्थिक फायद्यासाठी काही महिलांमार्फत वेश्याव्यवसाय चालवत असल्याचे आढळून आले
या प्रकरणी निखिल बाळासाहेब जाधव (पो/हवा ब.नं 32 नेमणूक दौंड पोलीस स्टेशन पुणे ग्रामीण) यांनी फिर्याद दिली असून आरोपी रितेश कुमार रमतारी पासवान (वय २६) याच्याविरुद्ध गुन्हा दाखल करण्यात आला आहे. पोलिसांनी घटनास्थळावरून सहा महिलांची सुटका केली असून त्यांच्याबाबत आवश्यक कायदेशीर प्रक्रिया सुरू करण्यात आली आहे.
या प्रकरणाचा पुढील तपास पोलीस निरीक्षक हेमंत शेडगे यांच्या मार्गदर्शनाखाली पोलीस उपनिरीक्षक बिद्री हे करीत आहेत.
