दौंड : दौंड तालुक्यातील यवत पोलिस स्टेशन हद्दीत असणाऱ्या भांडगाव मध्ये तीन आरोपींना तीन गावठी पिस्तुल, पंधरा काडतूसांसह ताब्यात घेण्यात येऊन त्यांच्याकडून चारचाकी वाहनासह ५ लाख ३७हजार ५०० रुपयांचा मुद्देमाल हस्तगत करण्यात आला आहे. ही कामगिरी
स्थानिक गुन्हे शाखा व यवत पोलिस स्टेशन च्या पोलिसांनी केली आहे. मंगेश शंकर मासोळे (वय २४) सुरज संजय शेलार (वय २६) रोहित प्रेमदास भुजवणे (वय २४, सर्व रा. यवत ता.दौंड, जि. पुणे) या तीन आरोपिंवर कारवाई करण्यात आली आहे.
नुकतेच विशेष पोलीस महानिरीक्षक रंजनकुमार शर्मा (कोल्हापूर परीक्षेत्र) यांनी अवैध अग्निशस्त्राचा वापर करून गुन्हे करणारे, अवैध अग्निशस्त्र बाळगणारे अभिलेखावरील आरोपीबाबत विशेष मोहिमेचे आदेश दिले असून यात आरोपींच्या वाहनांची, राहत्या घरांची कायदेशीररित्या झडती घेवून आक्षेपार्ह चीज वस्तू मिळ्रन आल्यास कायदेशीर कारवाई करण्याचे आदेश दिले आहेत. त्या अनुषंगाने पुणे ग्रामिण पोलीस अधीक्षक संदीप सिंह यांनी पुणे ग्रामीण पोलीसांना तसेच स्थानिक गुन्हे शाखेला मागदर्शक सुचना केल्या होत्या.
त्यानुसार स्थानिक गुन्हे शाखेची तपास पथके अवैधरित्या अग्निशस्त्र, गावठी पिस्तुल बाळगणारे, खरेदी- विक्री करणारे, गावठी पिस्तुलचा वापर करून गुन्हे करणाऱ्या आरोपीबाबत माहिती घेण्यात येत आहे. या विशेष मोहिम अंतर्गत कारवाई करण्याच्या अनुषंगाने स्थानिक गुन्हे शाखा पथक दि.०७/०७/२०२६ रोजी यवत पोलिस ठाणे हद्दीत पेट्रोलिंग करत असताना भांडगाव परिसरात एक नंबर नसलेली पांढऱ्या रंगाच्या बलेनो कारमध्ये तीन इसम असून त्यांच्याजवळ अवैध गावटी पिस्तुल आहे, अशी खात्रोशीर माहिती मिळाल्यानंतर या पथकाने वरिष्ठ अधिकाऱ्यांना वरील गोपनीय माहिती दोन पंचांसमक्ष संयुक्तरित्या कारवाई करत भांडगाव गावातील सोनाक्षी मंगल कार्यालयासमोरील परिसरात सापळा लावून संशयित बलेनो कार थांबवत कारमधील तीन इसमांकडे चौकशी केली असता त्यांच्याकडे तीन गावठी पिस्तूल आणि १५ काडतूस मिळून आली.
सदरची कामगिरी पुणे ग्रामिण चे पोलीस अधीक्षक संदीप सिंह गिल्ल, अपर पोलीस अधीक्षक गणेश बिरादार (बारामती विभाग) उपविभागीय पोलीस अधिकारी बापूराव दडस (दौंड विभाग) यांच्या मार्गदर्शनाखाली, स्थानिक गुन्हे शाखेचे पोलीस निरीक्षक प्रमोद क्षीरसागर, यवत पोलिस स्टेशनचे पोलिस निरीक्षक संतोष तासगावकर, स्थानिक गुन्हे शाखेचे पोसई महेश डोंगरे, पोलीस अंमलदार सचिन घाडगे, आसिफ शेख, तुषार पंदारे जनार्दन शेळके,संजू जाधव, राजू मोमीण, विकास पाटील गुरूनाथ गायकवाड,सुभाष राउत, योगेश नागरगोजे, विकास कापरे यवत पोलिस स्टेशन चे पोलीस अंमलदार संदीप देवकर, धीरज जाधव, मोहन भानवसे यांनी केली आहे. पुढील तपास यवत पोलिस करीत आहेत.
