दौंड : दौंड पोलीस ठाणे व स्थानिक गुन्हे अन्वेषण शाखा, पुणे ग्रामीण यांच्या संयुक्त पथकाने दिनांक 30/05/2026 रोजी बोरावकेनगर, गोपाळवाडी (ता. दौंड जि. पुणे) येथील रिलॅक्स इन लॉजिंगवर छापा टाकून अनैतिक मानवी व्यापार व वेश्या व्यवसायाविरुद्ध यशस्वी कारवाई केली. पोलीस निरीक्षक गोपाळ पवार यांना मिळालेल्या गोपनीय माहितीनुसार सदर लॉजमध्ये महिलांकडून वेश्या व्यवसाय चालविला जात असल्याची खात्री झाल्यानंतर बनावट ग्राहक पाठविण्यात आला.
बनावट ग्राहकास लॉजमध्ये महिलांची निवड करण्यासाठी पैसे घेऊन पाठविण्यात आले होते. त्यावेळी लॉजमधील महिलांकडून पैशांच्या मोबदल्यात शरीरसंबंध ठेवण्याची तयारी दर्शविण्यात आल्याचे निष्पन्न झाले. यानंतर पोलीस पथकाने सायंकाळी सुमारे 5.00 वाजता लॉजिंगवर छापा टाकला असता तेथे ६ महिला आढळून आल्या. या कारवाईत ५० रुपये किमतीची कंडोम पाकिटे तसेच बनावट ग्राहकास दिलेल्या ५०० रुपयांच्या दोन नोटा असा मुद्देमाल जप्त करण्यात आला.
तपासादरम्यान लॉज चालक मनोज अनिल पवार (वय 35 वर्षे, रा. फलटण, जि. सातारा) हा सदर ठिकाणी वेश्या व्यवसाय चालवत असल्याचे निष्पन्न झाले. त्याच्याविरुद्ध अनैतिक मानवी व्यापार (प्रतिबंधक) अधिनियम, अन्वये दौंड पोलीस ठाण्यात गुन्हा दाखल करण्यात आला आहे. या कारवाईत सापडलेल्या सहा महिलांची सुटका करून त्यांना आवश्यक ती मदत व समुपदेशनासाठी पुढील कार्यवाही करण्यात येत आहे.
सदर कारवाई पोलीस अधीक्षक संदीप सिह गिल्ल, अपर पोलीस अधीक्षक गणेश बिरादार, दौंड विभागीय पोलिस अधिकारी (डीवायएसपी) बापूराव दडस, यांच्या मार्गदर्शनाखाली पोलीस निरीक्षक गोपाळ पवार, दौंड पोलीस ठाण्याच्या व स्थानिक गुन्हे अन्वेषण शाखा, पुणे ग्रामीण यांच्या पथकाने पथकाने केली आहे.
