पुणे : पुणे ग्रामीण दहशतवाद विरोधी पथक (एटीएस) ने शनिवार दिनांक २ मे रोजी उरुळीकांचन येथून मोक्का गुन्ह्यातील आरोपीला जेरबंद केले आहे. सदर आरोपी ६ वर्षांपूर्वी येरवडा जेलमधून पळाला होता. ६ वर्षापासून फरार असलेला आणि रेकॉर्डवर असलेला सराईत गुन्हेगार अजिंक्य उत्तम कांबळे (वय ३१ वर्षे रा.टिळेकरवाडी ता.हवेली जि.पुणे) याला पुणे ग्रामिण च्या एटीएस पथकाने शिताफिने जेरबंद केले आहे.
दिनांक २३ डिसेंबर २०१९ रोजी आरोपी अजिंक्य उत्तम कांबळे व त्याच्या तिन साथीदारांनी उरुळीकांचन (ता.हवेली जि.पुणे) येथील प्लॉटींग व्यावसायिक विशाल खेडेकर यांना २० लाख रुपये खंडणीसाठी गाडीतून पळवून नेवून कोयत्याचा धाक दाखवून मारहाण केली होती व खंडणी न दिल्यास व्यावसायिक नुकसान व त्याचे कुटुंबाला जीवे मारण्याची धमकी दिली होती.
खेडेकर यांनी दिलेल्या फिर्यादीवरुन लोणीकाळभोर पोलीस स्टेशनला खंडणी व महाराष्ट्र संघटीत गुन्हेगारी नियंत्रण अधिनियम सह मोक्का कायदा अंतर्गत गुन्हा दाखल करण्यात आला होता. त्यावेळी गुन्ह्यातील मुख्य सुत्रधार अजिंक्य उत्तम कांबळे व त्याचे अन्य साथीदारांना पोलिसांनी अटक करुन त्यांची येरवडा कारागृहात रवानगी करण्यात आली होती.
मात्र जुन २०२० मध्ये आरोपी अजिंक्य कांबळे व त्याच्यासोबत येरवडा जेलमध्ये असलेले इतर ५ आरोपिंनी रात्रीच्या वेळी खिडकीचे गज काढून फरार झाले होते. त्यानंतर येरवडा पोलीस स्टेशनला गुन्हा दाखल करण्यात आलेला होता. त्यावेळी जेलमधून पळून गेलेले ६ आरोपींचा पुणे शहर व पुणे ग्रामीण पोलीसांकडून शोध घेवून त्यापैकी ५ आरोपींना जेरबंद करण्यात पोलीसांना यश आलेले होते परंतु अजिंक्य कांबळे हा पोलीसांना गुंगारा देत होता.
अजिंक्य कांबळे हा रेकॉर्डवरील सराईत गुन्हेगार असून त्याचेवर यापूर्वी लोणीकाळभोर, उरुळीकांचन व यवत पोलीस स्टेशनला खुन तसेच खंडणी, गंभीर दुखापत, मोक्का, आर्म ॲक्ट व चोरी असे एकूण ८ गंभीर स्वरुपाचे गुन्हे दाखल आहेत. आरोपी अजिंक्य कांबळे हा फरार असल्याने व त्याचेपासून प्लॉटींग व्यवसायिक विशाल खेडेकर यांच्या जिवीतास धोका असल्याने मागील ६ वर्षापासून त्यांना पोलीस अंगरक्षक संरक्षण देण्यात आले होते.
अजिंक्य कांबळे यास पकडणेसाठी पुणे शहर व पुणे ग्रामीण तसेच पोलीस स्टेशन व गुन्हे शाखेची वेगवेगळी स्वतंत्र पथके त्याचे मागावर होती. तो नेहमी राहण्याची ठिकाणे तसेच परराज्यात वास्तव्य करुन नाव बदलून व वेषांतर करुन राहत होता. सदर आरोपी हा परराज्यात असताना अवैध गावठी पिस्तूल विक्री करणाऱ्या गुन्हेगारांच्या संपर्कात असल्याची माहिती पुणे ग्रामीण एटीएस पथकाचे सहाय्यक पोलीस उपनिरीक्षक महेश गायकवाड व पोलीस हवालदार निलेश कदम यांना मिळाली होती. सदर माहिती प्रमाणे पोलीस अधीक्षक संदिपसिंह गिल्ल यांनी त्याचा शोध घेणेसाठी एटीएस पथकाची नेमणूक केलेली होती. त्याप्रमाणे सदर पथकाने त्याची माहिती काढून त्याचेवर पाळत ठेवून उरुळीकांचन सोलापूर रोड येथून वेषांतर करून त्यास शिताफीने ताब्यात घेतलेले आहे.
सदर आरोपी यास फरार राहणेसाठी कोणी मदत केली ? त्याचे संपर्कात कोण होते ? याबाबत पोलीसांकडून अधिक तपास चालू आहे. सदर कामगिरी ही पुणे जिल्हा पोलीस अधीक्षक संदिपसिंह गिल्ल व बारामती अपर पोलीस अधीक्षक गणेश बिरादार यांचे मार्गदर्शनाखाली दहशतवाद विरोधी पथकाचे सहाय्यक पोलीस निरीक्षक प्रकाश पवार, सहाय्यक पोलीस उपनिरीक्षक महेश गायकवाड, पोलीस हवालदार निलेश कदम, सुनिल कोळी, पोलीस कॉन्स्टेबल मोसीन शेख, ओंकार शिंदे यांचे पथकाने केलेली आहे.
