केडगाव : दिनांक १०/०३/२०२६ रोजी दौंड तालुक्यातील प्राथमिक आरोग्य केंद्र केडगाव येथे एच.पी.व्ही लसीकरण मोहिमेस सुरुवात करण्यात आली. यावेळी जिल्हा परिषद सदस्य तुषार थोरात, पंचायत समिती सदस्य धनंजय शेळके, केडगाव ग्रामपंचायतच्या सरपंच पुनम बारवकर यांसह विविध मान्यवर उपस्थित होते.
यावेळी प्राथमिक आरोग्य केंद्र केडगावच्या वैद्यकीय अधिकारी डॉ. नीलिमा लोखंडे यांनी या लसीबद्दल उपस्थितांना मार्गदर्शन करताना, सोशल मीडियावर पसरणाऱ्या अफवांवर विश्वास न ठेवता आपल्या १४ वर्षावरील व १५ वर्षांखालील मुलींना ही लस देण्यास पालकांना आवाहन केले. लस संदर्भात काहीही शंका असल्यास आरोग्य केंद्रातील कर्मचारी यांना भेटून शंकानिरसन करण्यास विनंती करण्यात आली. याप्रसंगी आंबेगाव येथील स्वामी विवेकानंद शाळेतील मुख्याध्यापिका, शिक्षक, १४ वर्ष वयोगटातील मुली व प्राथमिक आरोग्य केंद्र केडगाव येथील कर्मचारी उपस्थित होते.
एचपीव्ही लस का महत्त्वाची?
गर्भाशयाच्या मुखाचा कर्करोग हा भारतीय महिलांमध्ये आढळणाऱ्या कर्करोगांपैकी दुसऱ्या क्रमांकाचा कर्करोग आहे. सन २०२४ च्या आयसीएमआर-एनसीआरपीच्या अहवालानुसार भारतामध्ये गर्भाशयमुखाच्या कर्करोगाचे सुमारे ७८,४११ नवीन रुग्ण आढळले आहेत. त्यापैकी ४२,३१२ महिलांचा मृत्यू या आजारामुळे झाला आहे. तसेच हा एकमेव लस प्रतिबंधक कर्करोग असून ही लस सर्व शासकीय संस्थामध्ये विनामूल्य उपलब्ध आहे.
