Sahkarnama Crime..
कुरकुंभ : एखाद्या चित्रपटात शोभेल अश्या पद्धतीने काल रात्री मन्या उर्फ महेश भागवत याचा कुरकुंभ जवळील मुकादमवाडी ब्रिजवर निर्घृण खून करण्यात आला आहे. या प्रकरणी महेश मारूती टुले (वय 25 वर्षे, धंदा खाजगी व्यवसाय, रा.ठि. तामखडा पाटस, ता. दौंड जि. पुणे) याने फिर्याद दिली असून त्याच्या फिर्यादीवरून दौंड पोलिसांनी आरोपी- 1) आनंद माकर, 2) विकी शितकल, 3) संतोष शितकल (तिघे रा. आंबीकानगर, पाटस ता. दौंड जि.पुणे) व त्यांचे इतर दोन साथीदार (नाव, पत्ता माहित नाही) यांच्यावर गुन्हा दाखल केला आहे.
मिळालेल्या माहितीनुसार दिंनाक 20/02/2026 रोजी रात्री 08.15 च्या सुमारास फिर्यादी व त्याचे माझे मित्र महेश उर्फ मन्या संजय भागवत, युवराज रामदास शिंदे व राज होले असे मोटर सायकलवरून पाटसकडे जात होते. सोलापूर पुणे हायवे वरील मुकादमवाडी ब्रिजवर ते आले असता यातील मुख्य सुत्रधार संतोष शितकल याच्या सांगण्यावरून तेथे आनंद माकर व विकी शितकल असे दोघांनी त्यांच्या इतर दोन साथीदारांच्या मदतीने सुरवातीला या सर्वांना पाठीमागून पिकअप गाडीने जीवे ठार मारण्याच्या उद्देशाने धडक देवून खाली पाडत जखमी केले आणि त्यानंतर फिर्यादी यांचा मित्र महेश उर्फ मन्या संजय भागवत, (वय 29 वर्षे रा. पाटस) याला कोयता व सत्तुरने सपासप वार करून जिवे ठार मारले.
या घटनेतील मृत हा मागील एका खुनाच्या गुन्ह्यातील मुख्य सूत्रधार होता अशी चर्चा या परिसरात होत असून त्या खुनाचा बदला म्हणून त्यालाही निर्घृणपणे संपविण्यात आल्याचे बोलले जात आहे. फिर्यादी यांनी दिलेल्या फिर्यादीवरून आरोपी (1) आनंद माकर, 2) विकी शितकल, 3) संतोष शितकल व त्यांच्या इतर दोन साथीदारांवर खुनाचा गुन्हा दाखल करण्यात आला आहे. या घटनेचा पुढील तपास दौंड पोलीस ठाण्याचे पोलीस निरीक्षक गोपाळ पवार हे करीत आहेत.
