पुणे : औरंगजेब च्या मृत्यूचे स्टेटस ठेवल्याने धार्मिक तेढ निर्माण करण्याचा ठपका ठेवत कुरकुंभ आणि बारामती येथील दोन तरुणांवर गुन्हा दाखल करण्यात आला आहे. ही कारवाई बारामती विभागाचे विशेष कार्यकारी दंडांधिकारी तथा अप्पर पोलीस अधिक्षक गणेश बिरादार यांच्या आदेशाने करण्यात आली आहे.
बारामती पोलिसांकडून मिळालेल्या माहितीनुसार, दि. ०२ मार्च रोजी बारामती शहर पोलीस स्टेशन हद्दीत पोलीसांना गोपनीय बातमीदार मार्फत खबर मिळाली की, आमीर हमीद खान (वय ३१ रा. लोंढेवस्ती गुणवडी ता. बारामती जि. पुणे) व शाहबाज अस्लम खान (वय २१ रा. कुरकुंभ ता. दौड जि.पुणे) या दोघांनी आपल्या इन्स्ट्राग्राम स्टेटसला औरंगजेब याचा फोटो ठेऊन ‘किंग ऑफ इंडीया बादशाहा औरगंजेब आलमगिर र.अ. इनकी ०३ मार्च १७०७ को वफात हुई’ (निधन झाले) यापद्धतीने धार्मिक तेढ निर्माण होईल असा आक्षेपार्ह मजकूर ठेवला. सदरच्या माहितीच्या अनुशंगाने लागलीच सदर इसमास पोलीस स्टाफच्या मार्फत ताब्यात घेऊन त्याच्या मोबाईलची तपासणी केली असता त्यावर गोपणीय माहितीचे अनुसार औरंगजेबाचे उदात्तीकरण करणारा फोटो व आक्षेपार्ह मजकूर मिळून आला.
सदर इसमाच्या कृत्यामुळे धार्मिक तेड निर्माण होऊन बारामती शहर हद्दीत कायदा व सुव्यवस्थेचा प्रश्न निर्माण होऊ नये याकरिता पोलीस निरीक्षक, विलास नाळे, बारामती शहर पोलीस स्टेशन यांनी त्याचे विरुद्ध भारतीय नागरिक सुरक्षा संहिता कलम 127 प्रमाणे प्रस्ताव तयार करून तो गणेश बिरादार (विशेष कार्यकारी दंडाधिकारी तथा अप्पर पोलीस अधीक्षक बारामती) यांना सादर केला. यावर सुनावणी घेऊन सदर इसमाची कृती ही धार्मिक तेढ निर्माण करणारी असल्याची खात्री झाल्याने, प्रतिबंधक उपाययोजना म्हणून, त्याने योग्य व लायक जामिनदार न दिल्याने त्याची १४ दिवसांकरीता रवानगी येरवडा मध्यवर्ती कारागृह पुणे येथे करण्यात आली.
बारामती शहर पोलीस स्टेशनकडून बारामती शहरातील वेगवेगळ्या सोशल मीडिया साइडवर, तसेच नागरिक ठेवत असलेल्या व्हाट्सअप स्टेटसवर बारकाईने लक्ष ठेवण्यात येत असून त्या माध्यमातून कोणत्याही धर्मा विरुद्ध तेढ निर्माण करणाऱ्या इसमांवर यापुढे देखील उचित कायदेशीर कारवाई करण्यात येणार आहे.
सध्या छत्रपती संभाजी महाराज बलीदान मास तसेच मुस्लीम बांधवांचा पवित्र रमजान मास चालु असून आगामी काळात हिंदू व मुस्लिम समाजाचे उत्सव येणार असून सदर उत्सवांच्या अनुषंगाने कोणत्याही प्रकारचे आक्षेपार्ह असे स्टेटस किंवा अफवा पसरवणाऱ्या मजकुराचा संदेश कोणत्याही धर्माच्या इसमाने कोणत्याही धर्मा विरुद्ध सोशल मीडियावर शेअर करू नये असे आवाहन पोलिसांकडून नागरीकांना करण्यात आले आहे.
