अख्तर काझी
दौंड : दौंड पोलिसांनी पुणे सोलापूर हायवेवर स्वामी चिंचोली हद्दीत ट्रक चालकांची लूटमार करणाऱ्या 6 आरोपींना जामखेड येथील कला केंद्रातून अटक केली आहे. या आरोपींनी ट्रॅक चालकांना मारहाण करून त्यांच्याकडे असणाऱ्या पैशांची लूटमार केली होती.
मिळालेल्या माहितीनुसार दिनांक ०७/१२/२०२४ रोजी ११:३० वाजन्याच्या दरम्यान फिर्यादीचा भाऊ व मालवाहतूक ट्रक चालक हे जेजुरीवरून माल भरून बेंगलोर येथे घेऊन जात होते. यावेळी एका बोलेरो गाडीतील सहा अनोळखी इसमांनी ट्रकला एक किलोमीटर पाठीमागून पाठलाग करीत ओव्हरटेक करून मल्लिकनाथ मठ स्वामी चिंचोली च्या हायवे वरती गाडी आडवी लावून ट्रक मालक व चालक यास लोखंडी टॉमी व लाथाबुक्याने मारहाण केली. यावेळी ट्रक चालकांच्या खिशातील 33 हजार रुपये रोख रक्कम जबरदस्तीने चोरून त्यांच्या पांढऱ्या रंगाच्या बोलेरो गाडीमध्ये बसून राशीन च्या दिशेने फरार झाले होते.
सदरची तक्रार प्राप्त होताच दौंड पोलीस स्टेशन येथे गुन्हा रजि. नंबर 882/2024 भा.न्या. स. कलम 310(2) प्रमाणे गुन्हा दाखल करण्यात आला होता. त्यांनतर तात्काळ पोलीस निरीक्षक गोपाळ पवार यांनी तपास पथकातील सहाय्यक पोलीस निरीक्षक नागनाथ पाटील, पो.उप. निरीक्षक रुपेश कदम व पोलीस अंमलदार यांना मार्गदर्शन करून आरोपी शोध करिता रवाना केले. गोपनीय बातमीदार व तांत्रिक माहितीच्या आधारे संशयित बोलेरो MH ४२ AS ६६५८ व संशयित इसम 1. तौफिक रियाज शेख 2. विक्रम बाळासो माडगे दोन्ही राहणार भिगवन तालुका इंदापूर जिल्हा पुणे, 3. शरद अशोक धेंडे, 4. हनुमंत रामभाऊ गायकवाड, 5. अमोल गौतम गायकवाड व 6. भिकाजी वाल्मीक धेंडे वरील चारही राहणार जींति तालुका करमाळा जिल्हा सोलापूर यांना जामखेड येथील कला केंद्र येथून ताब्यात घेऊन त्यांची कसून चौकशी केली असता त्यांनी गुन्हा केल्याचे कबुल केले.
सदर गुन्ह्यात वरील नमूद आरोपींना अटक करून त्यांना माननीय न्यायालयात हजर केले असता माननीय न्यायालयाने त्यांना तीन दिवस पोलीस कोठडी सुनावली आहे. गुन्ह्यात वापरलेले बोलेरो गाडी, लोखंडी टॉमी व रोख रक्कम असा एकूण ६,०१,०००/-रुपये किमतीचा मुद्देमाल जप्त करण्यात आला आहे. सदर गुन्ह्यातील उर्वरित रकमेबाबत पुढील तपास सहा. पोलीस निरीक्षक नागनाथ पाटील हे करीत आहे.
सदरची कारवाई पुणे ग्रामीणचे पोलीस अधीक्षक श्री. पंकज देशमुख, अप्पर पोलीस अधीक्षक, बारामती श्री. गणेश बिरादार, उपविभागीय पोलीस अधिकारी, दौंड विभाग श्री बापूराव दडस व दौंड पोलीस स्टेशनचे पोलीस निरीक्षक श्री गोपाळ पवार यांच्या मार्गदर्शनाखाली सहाय्यक पोलीस निरीक्षक नागनाथ पाटील, पो.उप.नि. रुपेश कदम, सहाय्यक फौजदार श्रीरंग शिंदे, मलगुंडे, पोलिस हवालदार अतुल पठाण, संजय नगरे, नवनाथ भागवत, अमोल नरोटे, गजानन शिंदे, चा.सहा. फौ.साळुंखे, मोघे, अंमलदार सागर म्हेत्रे, रमेश कर्चे यांनी केली आहे.
