पुणे : विषारी दारूमुळे पुण्यात तब्बल १३ जणांचा मृत्यू झाला आहे. पिंपरी चिंचवड, दापोडी परिसरात आठ तर हडपसर, काळेपडळ भागात ५ अश्या १३ जणांचा मृत्यू झाला आहे.
पिंपरी-चिंचवड, दापोडी परिसरात घडलेल्या या घटनेबाबत वरिष्ठ पोलिस अधिकाऱ्यांकडून मिळालेल्या माहितीनुसार नातेवाईकांकडून अजून तरी विषारी दारू पिऊन मृत्यू झाल्याची तक्रार देण्यात आली नाही मात्र हे सर्व मृत्यू विषारी दारू पिऊन झाल्याचा अंदाज व्यक्त केला जात असून एका संशयित दारू विक्रेता योगेश वानखेडे याला राज्य उत्पादन शुल्क विभागाने ताब्यात घेतल्याची माहिती मिळत आहे.
विषारी केमिकल द्रव्य वापरल्याचा संशय – दारू बनवणाऱ्या वानखेडे याने मुंबईवरून इथेनॉल किंवा स्पिरिट सारखे द्रव्य आणून त्यापासून ही दारू बनविल्याचा संशय असून तो ही गावठी दारू तयार करून पिंपरी-चिंचवड आणि पुण्यात विक्री करत असल्याची माहिती मिळत असून त्याच्या या विषारी दारुमुळे हे १३ मृत्यू झाल्याचा संशय व्यक्त केला जात आहे. वानखेडे याने विक्री केलेल्या दारुचे कॅन पोलिसांनी जप्त केले आहेत.
मृत्यू झालेल्या लोकांना पोटदुखी, मळमळ आणि तोंडातून फेस येणे यांसारखी लक्षणे दिसत होती त्यानंतर या लोकांचा मृत्यू झाला. दापोडी येथे आठ जणांचा संशयित विषारी दारूमुळे मृत्यू झाल्याच्या घटनेनंतर पुण्यातील हडपसर व काळेपडळ पोलिसांकडून या प्रकरणाचा तपास सुरू असून अद्याप कोणतीही अधिकृत तक्रार दाखल झालेली नाही. पोस्टमार्टम अहवाल आणि फिर्यादीच्या आधारे पुढील गुन्हा नोंदविण्यात येणार असल्याचे पोलिसांनी स्पष्ट केले आहे.
