पुणे : पुणे ग्रामीण दहशतवाद विरोधी पथकाने (एटीएस) बुधवार दिनांक ८ रोजी पुणे जिल्ह्यातील शिरूर परिसरात छापा टाकून २ तरुणांकडून एक गावठी पिस्टल जप्त करण्यात आलेले आहे. पुणे जिल्हा पोलीस अधीक्षक श्री संदीप सिंह गिल यांनी अवैध अग्निशस्त्र बाळगणारे यांची माहिती काढून त्यांचेविरुद्ध विशेष मोहीम राबवणे बाबत दहशतवादी विरोधी पथकास आदेश दिलेले होते.
पुणे ग्रामीण दहशतवाद विरोधी पथक हे शिरूर परिसरांमध्ये अवैध अग्निशस्त्र बाळगणारे यांची माहिती काढत असताना सदर पथकास शिरूर पोलीस स्टेशन हद्दीत शिरूर सतरा कमान रोड, पांजरपोळ समोर ता.शिरूर जि.पुणे येथे एक इसम गावठी पिस्टल बाळगून फिरत आहे अशी खत्रीशीर बातमी मिळाल्याने शिरूर पोलीस स्टेशन यांचे मदतीने सदर ठिकाणी छापा टाकून संशयितरित्या मिळून आलेले इसम १) सुमित वसंत शेळके (वय २० वर्ष रा.पळवे खुर्द, शेळके वस्ती ता.पारनेर जि.अहिल्यानगर) २) साजिद रफिक खान (वय ३० वर्ष रा.मंगलमूर्ती नगर, शिरूर ता.शिरूर जि.पुणे) यांना ताब्यात घेऊन त्यांचेकडून विनापरवाना व बेकायदेशीरपणे बाळगलेले ५०,०००/- रुपये किमतीचे गावठी पिस्टल जप्त करण्यात आलेले आहे. सदरचे गावठी पिस्टल हे साजिद खान याने सुमित शेळके याला विक्री केल्याचे निष्पन्न झालेले आहे.
सदर दोघे आरोपी यांचेविरूध्द शिरूर पोलीस स्टेशन येथे गुन्हा रजिस्टर नंबर ३०८/२०२६ भारतीय हत्यार कायदा कलम ३ (२५) प्रमाणे गुन्हा दाखल करण्यात आलेला आहे.
सदर गुन्ह्यातील दोघे आरोपी सुमित शेळके व साजिद खान हे रेकॉर्डवरील सराईत गुन्हेगार असून त्यांचे विरुद्ध सुमारे एक वर्षांपूर्वी अहिल्यानगर सुपा एमआयडीसी येथे ट्रान्सपोर्ट कॉन्ट्रॅक्टचे कारणावरून खुनाचा प्रयत्न केले बाबत गंभीर स्वरूपाचा गुन्हा दाखल आहे.
सदर कामगिरी ही पुणे जिल्हा पोलीस अधीक्षक संदीपसिंह गिल्ल, अपर पोलीस अधीक्षक रमेश चोपडे, शिरूर पोलीस स्टेशनचे प्रभारी पोलीस निरीक्षक हेमंत शेडगे यांच्या मार्गदर्शनाखाली दहशतवाद विरोधी शाखेचे सहाय्यक पोलीस निरीक्षक प्रकाश पवार, सहाय्यक पोलीस उपनिरीक्षक महेश गायकवाड, विशाल गव्हाणे, पोलीस हवालदार निलेश कदम, रवींद्र जाधव, मोसीन शेख, ओंकार शिंदे, जालिंदर मुळीक, तसेच शिरूर पोलीस स्टेशनचे पोलीस उपनिरीक्षक शुभम चव्हाण, नीरज पिसाळ यांचे पथकांने केलेली आहे.
सदर आरोपींना कोर्टासमोर हजर केले असता ६ दिवस पोलीस कस्टडी रिमांड देण्यात आलेली आहे. आरोपींनी सदरचे गावठी पिस्टल कोणत्या कारणासाठी व कोठून आणले? याबाबत पुढील अधिक तपास शिरूर पोलीस स्टेशन करीत आहे.
