दौंड
दौंडमध्ये भगवे वादळ ग्रुपच्या वतीने छत्रपती शिवाजी महाराजांच्या राज्याभिषेक सोहळ्याचे आयोजन करण्यात आले. यावेळी येथील शिवाजी महाराजांच्या अश्वारूढ स्मारकाला पुष्पहार अर्पण करीत आमदार राहुल कुल यांच्या हस्ते महाराजांची आरती करण्यात आली.
याप्रसंगी मा.नगराध्यक्ष योगेश कटारिया, मा. नगरसेवक बबलू कांबळे, अरुणा डहाळे तसेच दत्ताजी शिनोलीकर, गणेश जगदाळे, अशोक जगदाळे, सचिन कुलथे, अश्विन वाघमारे, अमोल काळे, अमोल सोनवणे, गणेश पवार, रवी पवार, नामदेव राहिंज, अर्चना साळुंखे, वैशाली धगाटे, उर्मिला भूमकर आदी मान्यवर उपस्थित होते.
राज्याभिषेक सोहळ्याच्या निमित्ताने बोलताना आमदार राहुल कुल म्हणाले की, भगवे वादळ ग्रुपने शिवराज्याभिषेक सोहळ्याचे आयोजन करून समाजाच्या भावना समाजापर्यंत पोहोचविण्याचे कौतुकास्पद कार्य केले आहे. छत्रपती शिवाजी महाराज यांनी सर्व जातिधर्मातील लोकांना बरोबर घेत चांगली समाजव्यवस्था उभी करण्याचा प्रयत्न केला. त्यांचे स्मरण करताना या परिसरातील कायदा-सुव्यवस्था चांगली राहील, सामाजिक सलोखा अबाधित राहील असे काम करावे. छत्रपतींनी सर्वसामान्य जनतेला डोळ्यासमोर ठेवून राज्य उभे केले, तसे या परिसरातील सर्वसामान्य जनतेच्या सुविधांसाठी आपण काय करतो याचा विचार करून, आपण आज येथून बाहेर पडताना मनाशी ठरविले पाहिजे तरच हा कार्यक्रम संपन्न होईल आणि जो उद्दिष्ट घेऊन हा कार्यक्रम संपन्न केला तो सफल होईल. त्यामुळे छत्रपतींनी कोणत्याही धर्माचा राग केला नाही आणि रयतेतील छोट्या छोट्या उपेक्षित घटकांना डोळ्यासमोर ठेवून त्यांनी राज्यकारभार केला, तोच आपल्या सर्वांकडून अपेक्षित आहे. मला खात्री आहे की येथील सामाजिक सलोखा चांगला करण्याचा प्रयत्न आपण सर्वांनी चालविला आहे त्याचे श्रेय सर्वांनाच देणे योग्य ठरेल आणि हीच परंपरा पुढे चालू ठेवणे हीच खऱ्या अर्थाने छत्रपती शिवाजी महाराज यांना आदरांजली ठरेल असे राहुल कुल म्हणाले.
भगवे वादळ ग्रुपचे अमोल जगताप, संतोष जाधव, राकेश भोसले ,अमोल जगदाळे, किरण खडके,विशाल मिसाळ, प्रथमेश कदम आणि मित्रपरिवाराने सोहळ्याचे आयोजन केले.
