दौंड : दौंड तालुक्यातील भांडगाव येथे काल दि. १६ फेब्रुवारी रोजी सकाळी ९:१५ च्या सुमारास एक चोरीची घटना घडली असून एका महिलेच्या गळ्यातील पाच तोळ्यांचे गंठण दुचाकीवर आलेल्या चोरट्यांनी काही समजायच्या आत चोरी करून पळ काढला आहे. याबाबत यवत पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, फिर्यादी रेखा विलास भगत (रा.कोऱ्हाळे, ता.बारामती, पुणे) ह्या त्यांच्या पतीसह ब्रिझा कार ने पुणे-सोलापूर हायवेने जात असताना दौंड तालुक्यातील भांडगाव जवळ त्यांच्या कार चा टायर पंक्चर झाला. त्यामुळे त्यांचे पती विलास भगत यांनी गाडीचे चाक बदलण्यासाठी गाडी सर्व्हिस रोडवर घेतली.
फिर्यादीचे पती कारचा पंक्चर झालेला टायर बदली करत असताना त्या ठिकाणी दोन अनोळखी इसम काळया रंगाच्या मोटार सायकलवर आले आणि त्यांनी फिर्यादी रेखा भगत यांच्या गळयातील पाच तोळे सोन्याचे गंठण जोरात हिसका मारून चोरी करत ते सर्व्हिस रोडने पुणे बाजुकडे जोरात निघुन गेले.
