पुणे : पुणे महानगर प्रदेश विकास प्राधिकरणाचे नवनियुक्त आयुक्त अभिजीत चौधरी यांची आज आमदार राहुल कुल यांनी सदिच्छा भेट घेतली. या भेटीदरम्यान दौंड विधानसभा मतदारसंघातील प्रलंबित विकासकामे, विशेषतः प्रधानमंत्री आवास योजनेतील अनुदानातील तफावत आणि तालुक्यातील रस्ते विकास या विषयांवर सविस्तर चर्चा करण्यात आली.
प्रधानमंत्री आवास योजनेअंतर्गत पीएमआरडीए क्षेत्रात सध्या शहरी भागासाठी २ लाख ५० हजार रुपये, तर ग्रामीण भागासाठी १ लाख २५ हजार रुपये अनुदान देण्याचे प्रस्तावित आहे. या मुद्द्यावर आमदार राहुल कुल यांनी आक्षेप नोंदवला. “एकाच प्राधिकरणाच्या कार्यक्षेत्रात राहणाऱ्या लाभार्थ्यांमध्ये असा भेदभाव करणे अन्यायकारक आहे. त्यामुळे शहरी आणि ग्रामीण अशा दोन्ही लाभार्थ्यांना समान अनुदान देण्यात यावे,” अशी आग्रही मागणी आमदार कुल यांनी यावेळी केली.
प्रधानमंत्री आवास योजना टप्पा-१ अंतर्गत ज्या लाभार्थ्यांचे अनुदान प्रशासकीय कारणांमुळे प्रलंबित आहे, ते तातडीने वितरित करण्यात यावे, अशा सूचना त्यांनी दिल्या. तसेच, योजनेच्या दुसऱ्या टप्प्याचा ‘सविस्तर प्रकल्प अहवाल’ (डीपीआर) तयार करण्याची कार्यवाही त्वरित सुरू करावी, जेणेकरून जास्तीत जास्त गरजू नागरिकांना स्वतःच्या हक्काचे घर मिळेल, असेही त्यांनी नमूद केले.
दौंड तालुक्यात PMRDA च्या माध्यमातून अनेक रस्त्यांची कामे प्रगतीपथावर आहेत. या कामांचा आढावा घेत आमदार राहुल कुल यांनी ही कामे तातडीने आणि दर्जेदार पद्धतीने पूर्ण करण्याच्या सूचना आयुक्तांना दिल्या. रस्त्यांची कामे वेळेत पूर्ण झाल्यास नागरिकांची वाहतुकीची मोठी समस्या सुटेल, याकडे त्यांनी प्रशासनाचे लक्ष वेधले.
या सर्व प्रलंबित मागण्यांवर आयुक्त अभिजीत चौधरी यांनी सकारात्मक प्रतिसाद दिला असून, जनहिताचे हे प्रश्न प्राधान्याने मार्गी लावण्याचे आश्वासन दिले आहे.
