दौंड : दौंड तालुका पंचायत समितीच्या सभापतीपदी आमदार राहुल कुल यांचे विश्वासू सहकारी सुखदेव सोनबा चोरमले तर उप सभापतीपदी सौ. अमृता अभिमन्यू गिरमकर यांची बिनविरोध निवड करण्यात आली आहे. या निवणूक प्रक्रियेनंतर आमदार राहुल कुल यांनी सभापती, उप सभापती तसेच पंचायत समितीचे नव निर्वाचित गटनेते राहुल भोसले यांचे पुष्पगुच्छ देऊन अभिनंदन केले आहे. आमदार राहुल कुल यांनी धनगर समाजाला सभापती पदाचे गिफ्ट दिल्याची भावना यावेळी धनगर समाजाच्या अनेक कार्यकर्त्यांनी व्यक्त केली.
दौंड पंचायत समितीच्या सदस्यपदी आमदार राहुल कुल (भाजप) यांचे आठ तर माजी आमदार रमेश थोरात राष्ट्रवादी काँग्रेस(अ.प) चे सहा सदस्य निवडून आले होते. आज दिनांक ९ मार्च २०२६ रोजी पंचायत समिती सभागृहात चोरमले आणि गिरमकर यांनी सभापती आणि उप सभापती पदासाठी उमेदवारी अर्ज दाखल केला होता. यावेळी त्यांच्या विरोधात प्रदीप किसन दिवेकर आणि मनिषा संतोष ताकवणे या राष्ट्रवादी काँग्रेसच्या पंचायत समिती सदस्यांनी सभापती, उप सभापती पदासाठी उमेदवारी अर्ज दाखल केला होता.
कुल आणि थोरात यांचे पंचायत समितीला बलाबल पाहता आमदार राहुल कुल यांचा सभापती, उप सभापती होणार यात शंका नव्हती आणि शेवटी झालेही तसेच माजी आमदार रमेश थोरात यांच्या गटातील सदस्यांनी अखेर या निवडणुकीतून माघार घेतल्याने सुखदेव चोरमले आणि अमृता गिरमकर यांची बिनविरोध निवड झाल्याचे निवडणूक निर्णय अधिकारी रेवनाथ लबडे यांनी जाहीर केले.
सर्वांना सोबत घेऊन पंचायत समितीच्या माध्यमातून विकास करणार – आमदार राहुल कुल.
पंचायत समितीच्या सभापती, उप सभापतीपदाची निवडणूक प्रक्रिया पार पडल्यानंतर दौंडचे आमदार राहुल कुल यांनी सभापती, उप सभापती यांचे पुष्पगुच्छ देऊन अभिनंदन केले, तसेच विरोधी पक्षाच्या सदस्यांनी उमेदवारी अर्ज मागे घेतले त्यामुळे त्यांचेही आ.कुल यांनी आभार मानले. यावेळी त्यांनी पंचायत समितीच्या माध्यमातून सर्वांना सोबत घेऊन कामकाज करण्याचा आमचा प्रयत्न राहील असे आवर्जून सांगितले.
