दौंड : बोगस पत्रकारांना हाताशी धरुन आमच्या अधिकृत पत्रकारांना टार्गेट करण्याचा प्रयत्न केल्यास जशास तसे उत्तर देऊ असा ईशारा महाराष्ट्र राज्य मराठी पत्रकार संघांचे जिल्हाध्यक्ष सिताराम लांडगे यांनी दिला आहे.
काही राजकीय मंडळी आणि गावपुढारी सध्या आपल्या स्वार्थाची पोळी भाजून घेण्यासाठी अधिकृत पत्रकार आणि संपादकांना धमक्या देणे, भाषणातून पत्रकारितेवर शिंतोडे उडवणे हे प्रकार सुरु केले आहेत. कारण काय तर या गावपुढाऱ्यांच्या काळ्या कारस्थानांना जनतेसमोर आणले जाऊ लागले आहे. ते होऊ नये म्हणून आता पत्रकारांना टार्गेट करण्याचे काम या महाभागांनी सुरु केले आहे. या सर्व प्रकारामुळे आता महाराष्ट्र राज्य मराठी पत्रकार संघही ॲक्शनमोडवर आल्याचे दिसत आहे.
सध्या पुणे जिल्हा आणि विविध तालुक्यांमध्ये बोगस पत्रकारांनी थैमान घातले आहे. अनेक ठिकाणी राजकीय व्यक्ती आणि गावपुढाऱ्यांचे पाळलेले चेले चपाटे आता हातात स्वयंघोषित चॅनेलचे बूम आणि गळ्यात प्रेस चे बोगस आयकार्ड घालून जनतेची आणि शासनाची फसवणूक करताना दिसत आहेत. या बोगस लोकांना हे गावपुढारी पत्रकारितेच्या नावाखाली अनधिकृत कामे करायला लावून आपला स्वार्थ साधून घेताना दिसत आहेत. मात्र या गावपुढाऱ्यांना पत्रकारितेतलं किती कळतं, जर्नालीजमकाय आहे, आरएनआय काय आहे, कोण प्रेस आयकार्ड वापरू शकतो आणि कोण नाही याची कसलीही माहिती नसताना केवळ आपल्या स्वार्थासाठी, गुन्हेगारांना पाठीशी घालण्यासाठी आणि आपल्यामागे गुन्हेगारांची फौज उभी करुन गावावर दहशत ठेवण्यासाठी अडसर ठरणाऱ्या खऱ्या पत्रकारांना टार्गेट करण्याचे षडयंत्र रचल्याचे दिसत आहे.
अशीच एक घटना परवा दौंड तालुक्यात घडली असून एका गावपुढाऱ्याने ज्याला पी.आर.बी ॲक्ट काय आहे, आर.एन.आय काय आहे हे माहित नसताना थेट अधिकृत पत्रकारांवर आपल्या बोगस चेले चपाट्यांसाठी तोंड सुख घेतल्याचे आणि बोगस पत्रकारांना पाठीशी घालण्यासाठी नको ते ज्ञान पाजळल्याचे व्हिडीओ व्हायरल झाले आहेत. स्वतःला स्वच्छ प्रतिमेचे उदाहरण सांगू पाहणाऱ्या या पुढाऱ्यांना आपला इतिहास आठवत नसावा मात्र तो इतिहास चाणाक्ष पत्रकारांच्या नजरेतून आणि त्यांच्या तिसऱ्या डोळ्यातून लपलेला नाही.
वेळ आली तर या गावपुढाऱ्यांच्या करनाम्यांची व्हिडीओ सहित पोलखोल होईल ही शक्यता गृहीत धरुन हे गाव पुढारी अधिकृत पत्रकारांना टार्गेट करत असल्याचे दिसत आहे. मात्र ज्यावेळी संपूर्ण इतिहासाचे सत्य समोर येईल त्यावेळी हे गावपुढारी नेमके कुठे तोंड लपवतील हे सांगणे सध्यातरी कठीण आहे.
निवडणुकीत फक्त अधिकृत वृत्तपत्र, पत्रकारांना मतदान कव्हरेज, मतमोजणीचा आदेश निघाला अण अनेकांचा जळफळाट झाला. यावेळी अनेकांना अधिकृत म्हणजे काय हे समजून चुकले. हातात एक बूम घेतला, कॅमेरा घेतला म्हणजे कोणी पत्रकार होत नाही तर त्यास भारत सरकारची संपूर्ण प्रोसेस आहे आणि त्यास अधिकृत शासकीय परवानगी लागते हे आता अनेकांना समजले आहे. महाराष्ट्र राज्य मराठी पत्रकार संघाचे अनेक पदाधिकारी अनेक वर्षांपासून बोगस प्रेस आयकार्ड तयार करुन ते वितरित करणाऱ्यांवर कारवाई करावी अशी मागणी करत आले आहेत. न्यूज च्या नावाखाली बोगस पोर्टल, युट्युब चॅनेल काढायचे. त्यानंतर त्याचे अनधिकृतपणे प्रेस आयकार्ड छापायचे आणि भोळ्या भाबड्या तरुणांना ते विकायचे असा धंदा काही स्वयंघोषित संपदाकांनी सुरु केला आहे. हा फसवणूकीचा प्रकार असून यावर कारवाई होते हे अनेकांना माहित नाही. खाकी ड्रेस घातला म्हणून कोणी पोलीस होत नाही तर त्यास शासनाची एक रीतसर प्रक्रिया पूर्ण करावी लागते, शासकीय परवानगी लागते. मात्र बोगसगिरीच्या या जाळ्यात अनेक तरुण गुरफटले जात असून आर.एन.आय रजिस्टर वृत्तपत्रांना काम करणाऱ्या अधिकृत पत्रकारांनी आता या गोष्टीची पोलखोल केल्याने भविष्यात अनेक तरुण फसवणूकीपासून वाचणार आहेत. तर गावपुढारी मात्र पत्रकारीतेच्या बाबतीत काडीची अक्कल नसताना या बोगसगिरीला खतपाणी घालताना दिसत आहेत.
