गुजरात : गुजरातमधील मोरबी येथे रविवारी संध्याकाळी एक मोठी दुर्घटना घडली आहे. येथे मच्छू नदीत बांधलेला केबल-ब्रिज (झूलता पूल) अचानक तुटल्याने 500 पेक्षा जास्त लोक नदीत पडले असून 30 मृतदेह आत्तापर्यंत नदीतून बाहेर काढण्यात आले असल्याचे खात्रीलायक वृत्त आहे. याबाबत एका अधिकृत हिंदी टीव्ही न्यूज चॅनेलने सुद्धा या दुर्घटनेत आत्तापर्यंत 32 लोकांचा मृत्यू झाला असल्याचे म्हटले आहे. लोकांना नदीतून बाहेर काढण्यासाठी बचावकार्य सुरू आहे. नूतनीकरणानंतर हा पूल नुकताच कार्यान्वित करण्यात आला होता.
पूल कोसळल्याने 500 पेक्षा जास्त लोक नदीत पडले आहेत. या अपघाताच्या वेळी पुलावर मोठ्या संख्येने लोक उपस्थित होते जे पूल तुटल्यानंतर नदीत फेकले गेले. लोकांना वाचविण्यासाठी पोलीस आणि प्रशासनासोबतच स्थानिक लोकही बचावकार्यात सहभागी आहेत. हा केबल पूल जुना असून केवळ 5 दिवसांपूर्वीच नूतनीकरणानंतर तो कार्यान्वित करण्यात आल्याचे सांगण्यात येत आहे. नूतनीकरणानंतरही एवढ्या मोठ्या अपघातानंतर आता अनेक प्रश्न उपस्थित होत आहेत.
गेल्या सात महिन्यांपासून या पुलाच्या दुरुस्तीचे काम सुरू होते. नूतनीकरणाचे काम एका कंपनीने केले होते. एवढ्या कालावधीनंतर पूल सुरू झाल्यामुळे रविवारी मोठ्या संख्येने नागरिक आपल्या कुटुंबीयांसह फोटो आणि सेल्फी घेण्यासाठी पुलावर पोहोचले होते. त्यानंतर अचानक पूल तुटल्याने 500 पेक्षा जास्त लोक नदीच्या पाण्यात फेकले गेले. आत्तापर्यंत 30 मृतदेह बाहेर काढण्यात यश आले असून मृतांचा आकडा वाढण्याची भीती व्यक्त केली जात आहे.
