दौंड : महाराष्ट्र प्राणी कल्याण कायदा सनियंत्रण समिती (मा. उच्च न्यायालय मुंबई व महाराष्ट्र शासनाद्वारे गठीत) “मानद प्राणी कल्याण अधिकारी” म्हणून दौंड तालुक्याच्या वरवंड येथील गोसेवक तथा प्राणीमित्र अहिरेश्वर जगन्नाथ जगताप यांची २९ डिसेंबर २०२४ रोजी नियुक्ती करण्यात आलेली आहे.
अहिरेश्वर जगताप यांनी गेली ११ वर्षांपासून संघर्ष करत, स्वतःच्या जीवाची पर्वा न करता निस्वार्थपणे गोसेवा केल्याबद्दल तसेच संकटात सापडलेल्या हजारो जखमी अन्य जीवांना वाचविल्यामुळे त्यांना ही संधी मिळालेली आहे. याबद्दल अहिरेश्वर जगताप यांनी शासनाचे तसेच पोलिस प्रशासनाचे व कायम आपल्यासोबत असणाऱ्या सहकाऱ्यांचे मनापासून धन्यवाद मानले.
मिळालेल्या संधीचे सोने करत अजून जास्तीत जास्त मुक्या जीवांच्या सेवेसाठी कार्य करणार असल्याचे अहिरेश्वर जगताप यांनी माध्यमांशी बोलताना सांगितले. मुंबई मंत्रालयातून सदर नियुक्ती ओळखपत्र स्वीकारत असताना सर्व श्रेय आई गोमातेचे व सहकारी मित्र यांचे आहे असेही ते यावेळी म्हणाले. जगताप यांना देशभरातून विविध संघटना व गोप्रेमी यांच्याकडून शुभेच्छा येत आहेत.
