मुख्यमंत्री वैद्यकीय सहायता निधी मिळविणे आता आणखी सोपे झाले, फक्त हे काम करा आणि मोफत वैद्यकीय सहाय्यता मिळवा

Health-आरोग्याविषयक

मुंबई : मुख्यमंत्री वैद्यकीय सहायता निधी मिळविणे आता आणखी सोपे झाले असून यासाठी आता रुग्णांच्या नातेवाईकांना मंत्रालयात येण्याची आवश्यकता भासणार नाही. आता सीएमएमआरएफ (CMMRF) या अ‍ॅप्लिकेशनवर अर्ज भरुन मदत मिळविता येणार असल्याची माहिती मुख्यमंत्री सहाय्यता कक्षाचे प्रमुख मंगेश चिवटे यांनी दिली आहे.

मुख्यमंत्री वैद्यकीय सहायता कक्षाने अवघ्या 14 महिन्यात 13 हजारांहून अधिक गरजू रुग्णांना एकूण 112 कोटी 12 लाख रुपयांची आर्थिक मदत वितरित केली आहे. वैद्यकीय सहायता निधी मिळविण्यासाठी

या ‘CMMRF’ ॲपवर अर्ज करुन मदत मिळविता येणार आहे. मुख्यमंत्री एकनाथ शिंदे यांच्या पुढाकाराने मागील वर्षी पहिल्याच जुलै महिन्यात 178 रुग्णांना 76 लाखांची मदत देण्यात आली होती.

https://play.google.com/store/apps/details?id=com.etech.cmrelief

मुख्यमंत्री एकनाथ शिंदे यांच्या संवेदनशीलतेमुळे मुख्यमंत्री वैद्यकीय सहायता निधीमध्ये अनेक-विविध आजारांचा समावेश देखील करण्यात आला आहे. यामध्ये अँजिओप्लास्टी, बायपास सर्जरी, कर्करोगावरील शस्त्रक्रिया, केमोथेरपी, डायलिसिस, जन्मतः मूकबधिर लहान मुलांच्यासाठी अत्यावश्यक असणारी कॉकलीयर इनप्लांट शस्त्रक्रिया, सर्व प्रकारचे अवयव प्रत्यारोपण शस्त्रक्रिया, रस्ते अपघात, विद्युत अपघात, भाजलेले रुग्ण, जन्मतः लहान मुलांच्या हृदयशस्त्रक्रिया आदींचा समावेश आहे.

मुख्यमंत्री वैद्यकीय सहाय्यता कक्षाने रुग्णसेवेत उत्कृष्ट कामगिरी करुन राज्यातील हजारो रुग्णांचे प्राण वाचविण्यात यश मिळविले आहे. यामुळे अनेक रुग्णांना अक्षरशः जीवनदान मिळाले आहे. गोरगरीब गरजू रुग्णांना दुर्धर आणि महागड्या शस्त्रक्रियांसाठी मुख्यमंत्री वैद्यकीय सहाय्यता कक्षातून अर्थसहाय्य केले जाते.