दौंड : दौंडचे माजी आमदार रमेश थोरात यांनी आज सकाळी आपला मतदानाचा हक्क बजावला. खुटबाव (ता.दौंड) येथील मतदान केंद्रावर सकाळी साडेसात वाजण्याच्या सुमारास माजी आमदार रमेश थोरात, त्यांच्या पत्नी मंगलताई थोरात, पूत्र तुषार थोरात हे मतदान करण्यासाठी पोहोचले. थोरात यांच्या कुटुंबियांनीही यावेळी आपला मतदानाचा हक्क बजावला.
माजी आमदार रमेश थोरात विरुद्ध विद्यमान आमदार राहुल कुल यांच्यामध्ये सरळ लढत होत असून आज दिनांक २० नोव्हेंबर रोजी मतदान प्रक्रिया पार पडत असून २३ नोव्हेंबर रोजी निवडणूक निकाल जाहीर होणार आहे.
कुल आणि थोरात या दोघांनीही निवडणूक प्रचारादरम्यान मोठ्या प्रमाणावर शक्ती प्रदर्शन केले होते. दोन्ही नेत्यांनी नागरिकांना आपापले म्हणणे पटवून देण्याचा प्रयत्न केला आहे.
