शिरुर : ज्या डॉक्टरांकडे जीवन रक्षक म्हणून पाहिले जाते तेच डॉक्टर जर भक्षक म्हणून वागू लागल्याने आरोग्य जगतामध्ये मोठी खळबळ माजली आहे. जे डॉक्टर जीवन वाचवतात तेच डॉक्टर आईच्या उदरात वाढत असलेल्या जीवांचा कर्दनकाळ बनल्याची घटना शिरुर तालुक्यात उघडकिस आली आहे.
शिरुर तालुक्यातील ढोकसांगवी येथे असणाऱ्या लाईफ केअर क्लिनिकमध्ये अवैधपद्धतीने गर्भलिंग निदान करण्याचा भयंकर प्रकार उघडकीस आला आहे. या सर्व प्रकाराला वेळीच रोखण्यासाठी आरोग्य प्रशासन आणि गृह विभागाच्या गुन्हे अन्वेषण शाखेने मोठी कारवाई करत या क्लिनिकवर छापा टाकून संपूर्ण दवाखाना सील केला आहे. हा सर्व प्रकार बीएएमएस ची पदवी घेतलेला डॉ. आकाश सुभाष मलगुंडे याच्या अधिपत्याखाली या क्लिनिकमध्ये चालत असल्याचे आता या कारवाईत स्पष्ट झाले आहे. या क्लिनिकमध्ये गर्भधारणापूर्व आणि प्रसवपूर्व निदान तंत्र (लिंग निवड प्रतिबंध) अंतर्गत नियमांचे उल्लंघन झाल्याचेही प्राथमिक तपासात स्पष्ट झाले आहे.
असा झाला भांडाफोड – या क्लिनिकमध्ये गर्भलिंगनिदान चाचण्या होत असल्याची माहिती पोलिसांना मिळाली होती त्यामुळे वाघोली पोलिस ठाण्याच्या महिला पोलिस हवालदार प्रतीक्षा पानसरे यांनी डमी रुग्ण म्हणून या क्लिनिकशी संपर्क साधला. त्यांनी या क्लिनिकमध्ये जावून या सर्व अनधिकृत प्रकाराचा पर्दाफाश केला आहे.
या सर्व प्रकारात केसनंद येथील नरेंद्र ठाकरे हा दलाल मध्यस्ती करत होता. याच दलालाच्या मध्यस्थीने लेटेस्ट डिजिटल तंत्रज्ञान असलेले मोबाईल ॲप वापरून गर्भस्थ अर्भकाचे लिंग निदान केले जात होते. हा प्रकार अत्यंत धोकादायक असून मानवतेला काळिमा फासणारा आहे. या कारवाईमध्ये गर्भपाताच्या गोळ्यांचा अनधिकृत साठा व वैद्यकीय उपकरणे जप्त करण्यात आली आहे. या क्लिनिकमधील सर्व साहित्य पंचनामा करून सील करण्यात आले आहे.
या कारवाईमध्ये आरोग्य सेवा पुणे मंडळचे उपसंचालक डॉ. भगवान पवार यांच्या मार्गदर्शनाखाली, जिल्हा शल्यचिकित्सक डॉ. नागनाथ येम्पल्ले व शिरूर ग्रामीण रुग्णालयाचे वैद्यकीय अधीक्षक डॉ. सचिन धस यांच्या उपस्थितीत पार पडली. क्राईम ब्रँच युनिट-७ चे डीसीपी राजेंद्र मुळीक व वरिष्ठ पोलिस निरीक्षक संतोष सोनवणे यांच्या पथकाने ही मोहीम यशस्वी केली.
