इंदापूर : इंदापूर तालुक्यातील पंधारवाडी येथील जय भवानी वि.का. सेवा सहकारी सोसायटीच्या सचिवाला एक हजार रुपयांची लाच घेताना पुणे लाचलूचपत प्रतिबंधक विभागाकडून रंगेहात पकडण्यात यश आले आहे.
यातील तक्रारदार हे शेतकरी असून त्यांनी त्यांच्या वडिलोपार्जित जमिनीच्या गट नंबर 173/2 वर पुणे जिल्हा सहकारी बँकेचे असलेले जुने पीक कर्ज दिनांक 24/03/2026 रोजी भरून नवीन कर्ज मिळणे करिता जय भवानी विविध कार्यकारी सहकारी सोसायटी, पंधारवाडी ता.इंदापूर यांच्या मार्फत पुणे जिल्हा बँकेकडे प्रस्ताव सादर केला होता.
यातील आरोपी लोकसेवक नाना चंद्रकांत बोराटे हे महाराष्ट्र शासनाच्या सहकार विभागातील कर्मचारी असून सध्या ते जय भवानी विविध कार्यकारी सहकारी सोसायटी पंधारवाडी येथे सचिव म्हणून नोकरीला आहेत. त्यांना तक्रारदार हे दिनांक 7/4/2026 रोजी नवीन पीक कर्जाच्या प्रस्तावाबाबत जय भवानी विविध कार्यकारी सोसायटी येथे भेटले त्यावेळी आरोपी यांनी त्यांना तुमचे 2 लाख 76 हजार रुपये नवीन पीक कर्ज मंजूर केले असून त्याचा मोबदला म्हणून 2,000 रुपये लाच द्यावी लागेल असे बोलून 2 हजार रुपयांच्या लाचेची मागणी केली.
त्यानंतर तक्रारदार यांनी दिनांक 08/04/2026 रोजी पुणे लाच लुचपत प्रतिबंधक विभाग, पूणे येथे तक्रार दिल्यानंतर तक्रारीच्या अनुषंगाने दि.8/04/2026 रोजी लाचलूचपत प्रतिबंधक विभागामार्फत पुणे जिल्हा मध्यवर्ती सहकारी बँक इंदापूर शाखा, इंदापूर जि पुणे येथे सापळा रचून केलेल्या लाच मागणी पडताळ्णी कारवाईदरम्यान आरोपी लोकसेवक नाना बोराटे यांनी तक्रारदार यांना पीक कर्ज मंजूर करून दिल्याच्या बदल्यात मोबदला म्हणून 1000/- रुपयांची लाच मागणी करुन ती स्विकारताना लाचलूचपत प्रतिबंधक विभागाचे पोलीस निरीक्षक अविनाश घरबुडे यांच्या पथकाने त्यांना रंगेहात पकडले आहे. त्यांच्या विरुद्ध सध्या इंदापूर पोलीस ठाणे येथे भ्रष्टाचार प्रतिबंधक कायदा 1988 अन्वये गुन्हा नोंद करण्याची प्रक्रिया सुरु आहे.
